Dokumentos sa operasyon kan Sanitary Landfill, kulang

September 12, 2019

An bagong Sanitary Landfill (SLF) sa Ciudad nin Naga padagos na an operasyon alagad conditionally approved an saindang permit na pig-isyu kan Department of Environment and Natural Resources (DENR), bako huli sa kawaran nin water treatment facility (WTF)


An kakulangan nin ibang mga dokumento na pigmamando kan DENR iyo an dahilan na nag-asegurar an City Hall isusumiter man giraray nganing ihabol.


Saro pa sa dahilan na dapat taposon muna an pigcoconstruhir na WTF.


Ini an mga pahayag ni Bonifacio Azur, opisyal na parataram kan PENR0-DENR Camarines Sur kan makuanan nin entrevista kan Bicol Mail sa isyu kan sarong environmentalist na dapat dai muna tinugotan an operasyon kan Sanitary Landfill mientras na dai pa natatapos an pigcoconstruhir na water  treatment facility na saro sa mga rekisitos kan ahencia.


Nagsunod sinda sa standard na dai matagas sa Yabo River an taguk kan basura mientras na pigcoconstruhir pa an faciliddad.


An pormal na operasyon sa partial na hiwas kan SLF ginibo kan nakaaging Agosto 14 na pinangenotan ni Alcalde Nelson Legacion asin opisyales lokal sa presencia kan mga opisyal kan DENR Bicol asin Camarines Sur, an pagbukas iyo man an naging pinal na desisyon kan City Hall na sarahan an labi na sa cincuenta años na Balatas dumpsite.


Si Engr. Joel Martin, jeje kan Solid Waste Management Office kan City Hall nagpatanid man sa publiko na sainda nang estrictong iimplementar an pagsuhay kan nalalapa asin nalalapang basura nganing dai tolos mapano an SLF. 


An operasyon kan SLF pigcuestion sa corte kan sarong environmentalist huli kan pagpalyar na magsunod sa pigmamando kan RA 2009 asin RA 9275, alagad dai nag-isyu kan pighahagad na aplikasyon sa Writ of Continuing Mandamus sa paagi kan Temporary Environmental Protection Order (TEPO) nganing pugolon muna an pag-operar kan SLF.


 An petition for mandamus pigplantiar kan ‘’The Generation Yet Unborn’’ na pigrepresentaran ni Abogado Allan Reiz Macaraig alagad an caso magpapadagos pa an bista sa corte. 
 

Share on Facebook
Share on Twitter
Please reload