Pagbanga kan 3rd district sa CSur political accommodation, sabi

September 12, 2019

Saro naman na political accommodation an propuestong ‘’reapportion’’ o pagbanga kan 3rd Congressional District kan Camarines Sur kaparejo man kan bersyon kan pagbanga kaidto sa dating premir distrito ni dating Diputado Dato Arroyo, ginibong duwang distrito nganing dai niya makalaban sa eleksyon si dating DBM Secretary Rolando Andaya Jr. na planong magbuelta sa dati niyang distrito.

 

Ini an pagtubod ni James Casilihan, lider kan Bayan Bikol matapos magpasar nin resolucion an Sangguniang Bayan kan Calabanga, Camarines Sur na hihurot sa Camara-Baja asin Camara-Alta para sa reapportion kan ika-tolong distrito ni Congresista Gabriel H. Bordado Jr.


Dai paman nagtao nin reaksyon si Bordado mientras na sibot kasoodma sa ginigibong budget hearing sa congreso alagad an saiyang Chief of Staff dating alcalde Abang Mabulo, sinabi kaini sa Bicol Mail sa paagi nin text message ‘‘Sa sako lang garo out of bounds an municipal resolution requesting both houses to create another district. 


Hinahalat kan opisina ni Bordado kun ano an nakadetalye sa resolucion na kaipuhan pang pirmahan ni Alcalde Eduardo Severo.


Sa sesyon regular kan nakaaging Lunes, Septiembre 9 sa SB kan LGU Calabanga inaprobaran an resolucion na pinadrenohan ni Consejal Levy Sta. Ana na saro sa rason para sa pag-uswag sa ngaran na economia kan bagong distrito asin dugang na mga proyecto.


Pinaboran kan gabos na miembros kan SB na may titulong ‘’A resolution requesting the House of Representatives and the Senate of the Philippines to Reapportion the 3rd Congressional District in the province of Camarines Sur. An mga banwaan kan distrito kinababalihan kan Calabanga, Bombon, Magarao, Canaman asin Camaligan suhay sa legislative district na macompuesto kan Ciudad nin Naga, Pili asin Ocampo.


Nagtutubod an lider kan progresibong grupo nganing makabuelong maka-candidato liwat si dating Diputado Luis Villafuerte na rehistrado na bilang botante kan barangay San Bernardino, Calabanga o siisay paman sa familia kan Villafuerte an posibleng tawan dalan sa political accommodation.


Si Villafuerte, dinaog ni Bordado sa nagtapos na midterm elections sa banwaan nin Calabanga nin labi sa 8 mil na boto asin sa enterong tercer distrito nakalamang an incumbent congressman nin nasa 20 mil na boto.
Sa ika-duwang beses liwat naman nagsangat nin protesta si LRV sa House of Representative Electoral Tribunal (HRET) na naghahagad para sa recounting kan resulta kan eleksyon kan Mayo 13, 2019.


Pigsasabi kaidto ni Diputado Arroyo na maasenso an duwang distrito mientras na magkakaigwa nin kanya-kanyang alokasyon hali sa inaapod kaidtong congressional discretionary fund (CDF) alagad dai man ini narealisar envez an nag-asenso iyo an mga politico, sabi pa.

Share on Facebook
Share on Twitter
Please reload