Security cluster andam na sa Peñafrancia fiesta

Andam na an Security Cluster na papangenotan kan Naga City Police Office sa mga civic asin religious activities ngonian na festividad ni Nuestra Señora de Peñafrancia nganing maseguro an seguridad kan mga bisita asin debotos na masungko sa kapiestahan ni Ina.

Sa press conference kan Lunes, Septiembre 9 na ginibo sa City Hall sinabi ni City Director Col. Felix Servita Jr. kan NCPO na katuwang ninda sa pagmantenir kan paz y orden iyo an augmentation force kan 9th Infantry Division kan Philippine Army, Public Safety Office asin Bureau of Fire Protection mientras na nagrarani na an pagcelebrar kan fiesta sa ciudad.

Nag-arabotan na an 1,500 na augmentation force na pinadara ni Regional Director Brig. Gen. Arnel Escobal asin 700 na mga soldados kan 9th ID.

Mapadara man nin augmentation an BFP hali sa pagtaraid na banwaan kan ciudad asin mawarak man nin dugang na 21 mga ambulancia sa pamamahala ni Dr. Vito Borja, an City Health Officer kan City Hall. Ini gagamiton encaso igwang mga emerhencia asin katuwang man ninda an City Disaster Risk Reduction Management Council asin iba pang mga volunteers.

An dugang na kapupulisan iwawarak sa manlaen-laen na mga simbahan, establisimiento de negosyo, mamantenir kan paz y orden sa traslacion asin fluvial procession ki Ina. Sinda iyo an ma-implementar kan mga estratihiya na pighaman kan Incident Management Team (IMT).

Saro sa mga misyon kan augmentation force kan PNP iyo an pagtaong seguridad sa mga ginigibong darakulang event mientras na an idedestinong pulis sa mga kalye compuesto nin mga naka-uniporme asin naka-sibilyan.

An IMT iyo an natukahan na mamahala sa pagpasunod kan Incident Command System, sarong paagi sa pagtao nin kasimbagan sa lambang maraot na insidente o sitwasyon na puedeng magbungkaras sa panahon na ginigibo an traslacion asin fluvial procession asin kan military asin civic parades.

Si Army Major Rickey Aguilar kan 9th ID nagpahayag man na an saindang tropa iyo man an natukahan sa mobile force sa saindang sakop na lugar iyo an Concepcion Grande, Pequena, Del Rosario, Pacol, Carolina, Cararayan, Panincuason, Mabulo, Tabuco asin iba pang mga barangay kan ciudad.

Nagpatanid man si Rene Gumba, jefe kan PSO sa mga paratienda sa gilid kan tinampo na dai sinda tutugotan sa panahon na gayo kan traslacion asin fluvial procession. (dpa)