SA GARCHITORENA, CSUR: Naghipa sa alcalde, pagiriba kinasohan na sa fiscalia

September 19, 2019

Nag-aatubang na nin caso kriminal an apat na mga suspechado na nagprobaran sa buhay kan re-electionistang alcalde kan Garchitorena, Camarines Sur asin sa saiyang esposa kaibahan an nagcacandidatong bise alcalde asin tsuper kan saindang service na Isusu Mux na nangyari sarong semana antes kan eleksyon kan Mayo 13, 2019.


Sa imbestigasyon kan Garchitorena Municipal Police Station nabisto an mga suspechado na nagpaarak-asak nin M-16 armalite sa mga biktima iyo sinda Larry Cultivo Alias Ka Lester kan barangay Antulon, Gebo Brasero kan Sta. Cruz, Virgil Balcueva Alias Ka Desan kan barangay Poloan asin James Nesis kan barangay Mandiklom, gabos kan banwaan nin Caramoan, Camarines Sur.

 

 

An pigprobaran na likidaron alagad nakalibre sa paghihipa iyo sinda Alcalde Nelson Bueza, an saiyang esposa na si Yolly, an saiyang running mate Marcelo Aragdon asin an tsuper Errol Arcilla.


Nagkaperang mga bala kan M-16 armalite an nagtama sa Isusu Mux na iyo an saindang piglulunadan alagad masuerte na anas nakasalbar asin mayong tinamaan nin bala.


Casong  attempted murder an sinangat kan MPS Garchitorena, sa pamamayo ni Chief of Police P/Capt. Angelo Romeroso na pendiente na  sa Provincial Prosecutors Office kan Camarines Sur na yaon sa Ciudad nin Naga.


Alagad naging cuestionable ki Alcalde Bueza an pagsangat nin caso kan MPS sa pigsasabing mga suspechado huli ta dai ngani siya pinaaram kan aksyon asin dai niya biristo an pigngaran na acusado.


Sa entrevista kan DZOK FM sa alcalde, sinabi kaini na blangko siya sa mga nginaranan dai niya midbid na anas taga Caramoan, CSur.


Posibleng  pinapaluwas kan MPS sa pamamayo ni COP Romeroso na igwa na sindang solusyon sa caso, sabi pa ni Bueza.


Sinabi kan alcalde na nahali na si mga acusasyon kan mga kalaban niya sa politica kan nakaaging eleksyon lokal na ‘’ambush me’’ an nangyari asin ngonian igwa nang mga suspechado na nag-aatubang nin caso kriminal.


An insidente nagiging isyu kan mga kalaban sa politica kan alcalde na an nangyari sarong casong ‘’ambush me’’ na saiyang pinapahimotikan.


Enot   nang sinabi kan jefe ejecutivo na antes nangyari an insidente kan Mayo 6, 2019 nakarecibe na siya nin homa sa buhay.


Nagtutubod an alcalde na kan panahon kan eleksyon may mga binabayadan an saiyang mga kalaban nganing takuton an saindang grupo sa pagcampanya.


Sa resulta sa nakaaging midterm elections nangyari an ubos kun ubos asin gabos kun gabos sa saiyang linyadang mga candidatong bise alcalde asin walong consejal.


Alagad an saiyang kalaban sa politica dai pa nacontento nagsangat nin protesta sa resulta sa nagtapos na pirilian lokal sa banwaan nin Garchitorena asin padagos pa an ginigibong recounting. (dpa)

Share on Facebook
Share on Twitter
Please reload