NCPO preparado sa seguridad ni Ina

Maabot sa 1,441 na uniformed personnel kan Philippine National Police (PNP), afuera kan augmentation force hali sa 9th Infantry Division kan Philippine Army sa Bicol an iwawarak antes magpuon an Fluvial Procession ki Nuestra Señora de Peñafrancia sa Sabado, Septiembre 21 nganing maseguro an paz y orden sa pagpuon kan prusisyon ki Ina hali sa Naga Metropolitan Cathedral sundo sa pagpuli sa estaran kaini sa Peñafrancia Basilica Minore.

Si NCPO City Director P/Col. Felix Servita Jr. nagpahayag bilang pamayo kan Security Cluster kan Multi-Agency Coordination Group (MAC-G) kan Joint Operation Center (JOC), perming naka-alerto an saindang personajes asin an augmentation force kan PNP asin PA tanganing macierto an matuninong na dalagan kan prusisyon ki Ina.

An 1,441 na uniformed personnel kaayon sa saindang trabajo iyo an magbantay kan bulos nin trafico sa mga tinampo na luwas kan simbahan asin sa gabos na matawong lugar.

Bako lang sa mga lugar kan actividades ni Ina envez maging sa upper barangay kan ciudad nagwarak pang miembros kan PNP mientras na an mga soldados kan 9th ID kabali sa saindang misyon iyo an pagpatrolya sa palaog asin paluwas sa Naga.

Maabot man sa 200 na intelligence personnel o covert security an nakadestino man sa mga estratihicong lugar.

Segun pa sa pamayo kan Security Cluster antes mag-alas-doce nin udto, isasarado na sa trafico an mga mayor na aagihan kan andas kan imahen ni El Divino Rostro asin Nuestra Señora de Peñafrancia sa mga lugar kan kalabaan kan Elias Angeles Street, General Luna pasiring sa danlugan sa tulay kan Tabuco. Liwat maimplementar nin paghira kan dalagan kan trafico nganing malikayan an pagkagurobot kan trafico.

Dinagdag pa ni Servita na apat na mga mayor na tulay sa centro kan ciudad na aagihan kan pagoda ni Ina sa salog Naga isasarado sa trafico asin dai tutugotan na magdalan sa ibabaw kan tulay an mga tawo. An mga tulay na ini kinababalihan kan Delfin Rosales Bridge sa Panganiban Drive, Tabuco Bridge, Colgante Bridge asin Magsaysay Bridge. Katuyohan kan JOC na makaibitaran sa ano man na trahedya asin aksidente sa tulay.

Si Rene Gumba, jefe kan JOC nagsabi na tolong mga helicopter an maconducir man nin tactical operations para sa dugang na seguridad kan ribo-ribong bisita asin mga devoto ni Ina mientras na ginigibo an Fluvial Procession.

Ini kinababalihan kan sarong Rescue/Medical Helicopter asin duwa pang iba bilang suporta man kan Philippine Air Force sa JOC ngonian na kapiestahan kan patrona kan Bikolandia.

An sarong helicopter para sa rescue and retrieval operations an ipapadara kan PAF sa panahon na ginigibo an fluvial procession asin an duwang tactical helicopters nganing magresponde kun igwang emerhencia na kaipuhan kan incident commander asin security cluster asin adalan an hiro kan mga tawo antes asin mantang ginigibo an prusisyon.

An duwang helicopter, segun ki Gumba papalupadon nganing maseguro an seguridad kan ribo-ribong mga tawo.

Sinabi pa ni Gumba an mga helicopter yaon na sa Camp Elias Angeles sa Pili, Camarines Sur na naghahalat lang nin ano man na apod hali sa jefe kan security cluster. (JN)