Juelga sa Sept. 30 dagos, alagad CSur nagiisip-isip pa

September 26, 2019

Dagos an nakatalaan na juelga nin transporte sa Bicol na magparticipar sa pang nasyonal na juelga kan Alyansa Kontra PUV Phase-Out sa Lunes, Septiembre 30 alagad pigreresolberan pa digdi sa Camarines Sur nganing 100 por cientong maparalisar an trafico.

 

An ibang federasyon nin transporte sa Camarines Sur hali sa premir asin segundo distrito an nagkumfirmar kan saindang actibong pagparticipar nganing ipaheling ninda sa gobierno an pusog na pagkontra sa implentasyon kan transport modernization program.


Si mga enot na protesta an mga lideres nin transporte sa Camarines Sur kulang an saindang  pinaheling na kooperasyon.


Si Joel Pillogo kan Condor – Piston Bicol nagsabi na ngonian na Viernes, Septiembre 27 maaraman kan publiko  an magiging decisyon kan  ibang  lider  nin transporte  sa CamSur nganing  ipaheling an sangatos por ciento pag-ayon sa juelga.


Katuyohan kan juelga nganing iprotesta an planong jeepney phase out puon sa Hulyo 1, 2020 base sa pinaluwas na memorandum kan Department of Transportation (DOTr) asin kan Land Transportation Franchising and Regulatory Board (LTFRB).


Inaabot nin 1.5 milyon hasta tres milyon pesos an cantidad kan Euro 4 na iriribay sa pampasajerong jeepney asin dakulaon an cantidad dai kakayahon kan ordinaryong operator.


Dawa magtugdas pa nin cooperativa grabe an cantidad asin halabaon pa an mga rekisitos asin an mangyayari apektado an mga operators alagad an mga darakulang negosyante na masuplay kan Euro 4 iyo an magyayaman na dati nang mga milyonaryo, sabi pa ni Pillogo.


An grupo na maprotesta nabilog matapos magkasararo an mga national transport groups, asin an mga local transport groups, sa pangenot kan PISTON, ACTO, STOP and GO, STOP, NTJPOC, asin MTC na saro nang alyansa labang sa planong jeepney phase-out. (dpa)

Share on Facebook
Share on Twitter
Please reload