SA PAGKAKAKUMFISCAR KAN P4.3-M NA SHABU: Bicol PNP, NCPO liwat tatawan nin onra

September 26, 2019

Tatawan nin onra kan City Hall an Composite team kan Special Operations Unit kan Bicol PNP asin an Naga City Police Office  (NCPO) na responsable sa pagkakadakop kan magkasaroan na nagtutulak nin ilegal na droga asin nabawi sa sainda an 700 gramos nin shabu na nagcacantidad nin P4.3 milyon.


Si Consejal Vidal Castillo nagsabi na an komendasyon itatao kan City Hall sa pamamayo ni Alcalde  Nelson  Legacion sa sarong programa pakatapos kan flag raising ceremony sa Lunes, Septiembre 30.


Si Castillo iyo an pagdreno kan resulocion numerado 2019-343 na nagtataong komendasyon sa mga opisyal kan Philippine National Police matapos madakop sa ginibong Anti-drug buy bust operation kan Septiembre 3, 2019 mga alas 7:30 nin banggui harani sa Civic Center sa Brgy. Balatas an mag-live in partner na sinda Yuner Inda y Tanbao, 33 años kan Diliman, Ciudad nin Quezon asin si Jamaica Dela Cruz, 23 años  na sarong estudiante na taga San Francisco, Magarao, Camarines Sur.


Sa itataong onra sa paagi nin resolucion na pinangenotan ni Castillo sa Sangguniang Panlungsod oya an titulo na ‘’Resolution recognizing and commending the Composite Team of the Regional Division 5 Special Operations Unit – Bicol PNP and Naga City Police Office led by P/Col. Felix Servita Jr., City Director, P/Major Alden Orequeta, Head of Special Operation Unit, P/Major Butch Moraleda of the NCPO Drug Enforcement Unit and P/Major Ireneo Andalis of Police Station 2 of the NCPO, for the successful apprehension of drug pushers and confiscation of 700 grams of shabu with street value of P4.3 million during an Anti- Drug Buy-Bust Operation in Brgy. Balatas, Naga City’’.


Ipinahayag  kan Consejal sa Bicol Mail na dakulang bagay an acomplisimiento kan mga awtoridad huli ta an mga suspechado saro sa dakulang supplier nin ilegal na droga sa Camarines Sur, Ciudad nin Naga, Masbate, Albay asin Sorsogon.


Si City Director Servita nagkumfirmar sa BM na sinda Tanbao asin Dela Cruz, saro sa mga dakulang nagsusuplay nin droga sa Ciudad nin Naga.


An dakulang cantidad nin shabu nakatalaan kuta nang ibariwas sa saindang parokyano kan panahon kan Peñafrancia fiesta alagad amay natalikop kan PNP.


Dinagdag pa kan consejal na sunod-sunod na an acomplisimiento kan PNP laban sa ilegal na droga asin dapat lang tawan sinda nin onra. 

Share on Facebook
Share on Twitter
Please reload