SA PANGAPUDAN KAN DA SA PLGUs: Capitolyo mabakal paroy kan mga paraoma

Pili, Camarines Sur – Suportado kan Capitolyo Provincial kan Camarines Sur an pangapudan kan Departamento de Agricultura (DA) na magtagama nin fondo tanganing magbakal kan paroy nin paraoma na apektado kan hababang presyo kasunod kan pag-epekto kan Acta Republica No. 11203 (Rice Tariffication Law).

Alagad an Amihan Organisasyon ng Kababaihan Magsasaka sa pamamayo ni Tess Cielo nagsabi na saindang aaramon kun nuarin iimplementar kan Capitolyo Provincial o sagcod sana sa plano.

Si OIC Regional Executive Director Rodel P. Tornilla kan DA Bicol dai palang nahahaloy pig-imbitaran sa sarong miting an mga provincial governors asin provincial agriculturist na saindang pigtawan nin duon dapat suportaran an mga paraoma huli kan apektado na kan pagbagsak kan presyo kan paroy.

Ini kasunod man kan enot na pangapudan ni DA Secretary William Dar na dapat mag-alokar nin fondo sa pagbakal nin paroy kan mga paraoma an lokal na gobierno kan provincia.

An suporta kan LGU Camarines Sur base sa saindang pinasar na ordinansa ‘’An Ordinance Establishing the Rice Subsidy Program in the Province and Appropriation/Allocating funds therefor’’.

Padreno kan ordinansa iyo si Vokal Nelson Julia, pamayo kan Committee on Agriculture kan Sangguniang Panlalawigan asin sinuportaran kan gabos na miembros kan SP asin aprobado na ni Gobernador Migz Villafuerte.

Base sa ordinansa an Gobernador kan Provincia awtorisado na mag-establiser asin mag-implementar kan Rice Subsidy Program na kun haen an Capitolyo Provincial iyo an direktang mabakal kan paroy kan paraoma sa tamang presyo asin dugang na subsidia.

An itatagamang fondo na kaipuhan sa implementasyon kan Rice Subsidy Program maghahali sa General Fund kan gobierno provincial.

Afuera kan LGU Camarines Sur an LGU Albay sa pamamayo ni Gobernador Al Francis Bichara nag-asegurar na kan saindang suporta sa pangapudan kan DA asin iba pang provincias kan Kabikolan.

An presyo kan paroy sa ngonian nag-aabot na sana sa P10 hasta P13 alagad kan dai pa na-epekto an Rice Tariffication Law igwa pang P17 hasta P23.

Agrangay na an sektor kan paraoma mala ngani saindang hinihurot sa congreso na enmiendahan o ibasura na an RA 11203.

Base sa ley tinatawan nin buelo an mga rice traders iyo na an mag-angkat nin bagas asin magsuplay sa mercado sa punto kan ley nganing magbaba an presyo alagad kabaliktaran halangkaw man giraray an presyo kan commercial asin imported rice. (dpa)