Naga pigdeclarang Justice Zone

October 3, 2019

Jefe Mahistrado Lucas P. Bersamin kan Corte Suprema nagsisimbag sa mga kahapotan kan media matapos kan ceremonya na nagdedeclara kan Ciudad nin Naga bilang Justice Zone.    (DPA)

 

Pasado sa mga kriterya kan Corte Suprema asin suportado kan Department of Justice asin Department of Interior and Local Government (DILG) na ideclara an Ciudad nin Naga bilang ika-apat na Justice Zone sa presenting administrasyon  kan      maretiro nang jefe mahistrado.


Si Chief Justice Lucas P. Bersamin nagpahayag sa miembros kan media sa Ciudad nin Naga kan saiyang pangenotan kan Lunes, Septiembre 30 an paglansar kan Justice Zone  (JZ) sa Ciudad nin Naga, ika-anom sa JZ sa iba pang ciudades sa nasyon nganing maparikas an pagbista kan mga caso asin magbawas an mga nagsusuroksokan na priso sa BJMP. 


Siya maretiro na sa Oktubre 18 alagad sa halipot na panahon apat na mga ciudades an saiyang piglansar  asin  kabali  digdi an  Ciudad  nin  Naga  na    yaon an mga mikanismo nganing ideclarang Justice Zone.
Si enot na duwang JZ piglansar kan taon 2014 asin 2018.


Afuera sa Naga, an iba pang JZ na enot nang piglansar sa Ciudad nin Quezon, Ciudad nin Cebu, Cuidad nin Davao, Ciudad nin Angeles asin Ciudad nin Bacolod.


Sinabi man ni Alcalde Nelson Legacion bilang JZ magtatarabangan sinda maparikas an dalagan kan hustisya kabali na an inaapod na local justice sector, kaayon digdi an procujurador, corte asin detention facility asin an comunidad  sa paagi kan LGU.


Kabali sa paglansar kan proyecto sa Naga City People’s Hall iyo sinda Charge d’affaires kan European Union to the Philippines Thomas Wiersing, DILG Secretary Eduardo Ano, Usec Markk Perete kan DOJ,  Naga City Regional Trial Court Executive Judge Erwin Virgilio P. Ferrer, Alcalde Legacion asin Bersamin.


An jefe mahistrado nagsabi pa na dakulang bagay sa proyecto an mga continuous trial and automation siring kan e-court system, electronic subpoena, asin an e-dalaw o electronic visitation program.


An  continues  trial system asin plea bargaining sa mga caso sa droga nagresulta man sa pagbaba kan mga pendienteng caso asin  sa mga pendienteng  caso  civil  asin    kriminal  base sa record  kan Deciembre 2016  hasta  Deciembre 2017.


Sa ciudad nin Naga, nagkapera nang may mga caso sa droga an nakinabang sa plea bargaining.
 

Share on Facebook
Share on Twitter
Please reload