PAKATAPOS KAN ROAD CLEARING OPERATIONS: Reg’l Validation Team kan DILG naglilibot sa Bicol

October 3, 2019

Ciudad nin Legazpi – Naglilibot na sa mga ciudades asin provincia an Regional Validations Team (RVT) kan Department of Interior and Local Government (DILG) sa Bicol nganing saindang maheling asin ma-evaluar an ginibong 60 diyas na road clearing operations na pig-implementar kan mga lokal na gobierno.


Ano man na resulta kan saindang inspeksyon asin validations isusumiter sa saindang opisina central nganing iyo an mag-aksyon ano man na reparo kun may kakulangan sa implementasyon.


Si Director Anthony Nuyda iyo an pamayo kan RVT nagwarak na kan saindang personajes sa mga provincia asin ciudades alagad an direktor an saiyang lugar iyo an Ciudad nin Legazpi.


An ibang mga opisyales kan ahencia pigbaranga an grupo sa ibang ciudades asin kabesira kan provincia nganing sinda mismo an mag-evaluar kun nagsunod sa direktiva ni Presidente Rodrigo Duterte na dapat garabaon an gabos na ulang na estraktura sa mga gilid kan tinampo o sa road right of way.


Sa Ciudad nin Naga, kasoodmang Miercules, Oktubre 2 nagcoordinar na sa opisina ni Alcalde Nelson Legacion si Olivio Ramirez an Local Government Division Chief kan DILG Bicol asin kabali sa saiyang mga banwaan asin ciudad na eevaluar iyo an Pili, CamSur, Daet, Camarines Norte asin Ciudad nin Naga.


Sa paglibot kan validation team sa Naga saindang nareparo na igwa pang mga kalye na ulang sa tinampo na dapat halion kan task force clearing operations kan City Hall. 

 

Alagad sinabi man ni Legacion na an saindang clearing operations dai natatapos sa laog nin 60 diyas envez magpapadagos.


An mga Local DILG Officer sa mga munisipyo sinda man an ma-inspeksyon kan ginibong mga road clearing operations alagad dapat magbalyo sindang kataid na banwaan bako kun saen nadedestino, sabi kan DILG Bicol. (dpa)

Share on Facebook
Share on Twitter
Please reload