Suspechado na nagbadil gadan sa jefe kan CSU, negatibo sa paraffin test

October 3, 2019

Nag-negatibo sa paraffin  test  kan  laboratoryo kan Philippine National Police (PNP) an nadakop na suspechado na nagbadil gadan ki Jose Francisco ‘’Jojo’’ Musa, jefe kan Civil Security Unit (CSU) kan Capitolio Provincial kan Camarines Sur.


Ini an kinumfirmar ni City Director Police Col. Felix Servita Jr. kan Naga City Police Office (NCPO) alagad bakong kaulangan nganing  ipadagos  an casong  murder  na pigsangat sa suspechadong si retiradong opisyal kan Philippine Army asin dating opisyal kan CSU na si Elmer Nelmida y Tolentino, 58 años.


Sinabi kan NCPO na dawa negatibo sa paraffin test an suspechado igwang testigos  na nagtutukdo na siya an naheling asin nagdulag matapos badilon an biktima sa saiyang residencia.


Consideradong sarado na an caso, sabi pa ni Servita.


Si Nelmida, nadakop kan pinagsarong fuersa kan NCPO asin Pili Municipal Police Station sa saiyang residencia sa Brgy. Caroyroyan, Pili, Camarines Sur mga alas 3:00 nin aga kan Septiembre 27 alagad nagpapahimotik sa akusasyon sa saiya kan mga awtoridad.


Siya dating katrabajo sa CSU ni Musa, nagpahayag sa media na igwa siyang hinanakit sa biktima kasunod kan pagpatanggal sa saiya sa trabajo asin pigdamay pa an saiyang esposa asin manugang na dai man dapat ginibo.


Alagad saiyang piglinaw na bako man dahilan nganing saiyang badilon gadan si Musa huli ta bako man maninigo an arog kaining krimen sa rason sana na igwa siyang kulog nin boot sa biktima.


Si Musa, dating Provincial Warden kan Tinangis Penal Farm na pinapadalagan kan Capitolio Provincial kan Camarines Sur.


An biktima binadil alas 6:30 nin banggui kan Septiembre 26 sa atubangan kan saiyang residencia sa Block 23, lot 16, Deca Homes Grandvale 1, barangay San Felipe, Ciudad nin Naga.


Siya may tamang tolong bala sa saiyang hawak  kan calibre 45 na pigdalagan sa Mother Seton Hospital alagad mga alas 8:00 nin banggui binawian man sana nin buhay.

Share on Facebook
Share on Twitter
Please reload