ERC vs sa pribadong korporasyon

October 17, 2019

Tigaon, Camarines Sur – An Energy Regulatory Commission (ERC) iyo na mismo an nagpatanid na malangkaw an singil sa tarifa sa kuryente oras na tugotan kan senado an operasyon kan Bicol Light and Power Corporation (BLPC) sa Rinconada area apesar na nagdadanay pa an franquicia kan Camarines Sur III Electric Cooperative (Casureco III).


Nasa senado na an House Bill 4437 matapos pangenotan ni Congresista LRay Villafuerte kan Hulyo 2019 na makalusot an bill nganing tugotan na matawan franquicia an BLPC.


Si General Manager Fortunato ‘’Ato’’ San Jose kan Camarines Sur IV Electric Cooperative (Casureco IV) nagsabi na an pagpasar kan bill maresulta sana sa halangkaw na singil sa tarifa sa kuryente nin huli ta an BLPC, bilang pribadong compania, sarong profit-oriented asin mapipiritan na magpalangkaw tarifa nganing makabawi kan saindang milyones peso na gastos sa maintenance and operation maging sa power infrastructure asin pagpadalagan kan compania.


An presenting  121 mga cooperativa nin electricidad sa nasyon yaon sa superbisyon kan National Electrification Administration (NEA), kun nagkakaigwa nin calamidad asin dakulang destroso sa mga linya an ahencia natabang  sa ngaran finansyal nganing maibuelta tolos an suplay nin kuryente.


Ano man na dakulang gastos sa power restoration sa mga danyos sa mga linya dai binabawi sa singil sa tarifa alagad sa pribadong korporasyon ibubuelta an saindang dakulang gastos sa paagi nin pagpatong nin singil sa tarifa, sabi pa.


An Bicol Electric Cooperative Association (BECA),  enot nang nagpasar nin resolucion na pigsumiter sa Camara-Baja kontra sa pagtaong franquicia sa BLPC, alagad iginilid sana.


Huli kaini, dadarahon ninda sa tinampo an protesta sa paagi kan regional caravan sa maabot na Oktubre 21.
Cuestionable sa BECA an planong pagtaong franquicia sa korporasyon mientras na sagcod sa ngonian an franquicia yaon pa sa Casureco III asin mapaso pa sa 2029.


An BECA kinababalihan kan Masbate Electric Cooperative, (Maselco), Ticao Island Electric Cooperative, Sorsogon I Electric Cooperative, Sorsogon II Electric Cooperative, Camarines Sur I Electric Cooperative (Casureco I), Casureco II, Casureco II asin Casureco IV, Camarines Norte Electric Cooperative asin First Catanduanes Electric Cooperative.


Sinda anas nacrear sa irarum kan PD 269 na may franquicia na pig-isyu kan NEA na kadakli mapaso sa taon 2029 alagad sa paagi kan RA 9136 o mas bestado sa Electric Power Industry Reform Act (EPIRA) binalyo na an pag-isyu nin franquicia hali sa NEA yaon na sa poder kan Congreso.

 

(DPAureus)

Share on Facebook
Share on Twitter
Please reload