Ciudad nin Naga liwat nadiskaril sa SGLG

October 24, 2019

Tulong veces nang nadiskaril an Ciudad nin Naga na makua an Seal of Good Local Governance (SGLG) asin an pinakahuri ngonian na taon, alagad piglinaw kan City Hall na saro sana sa pitong kriterya an dai ninda na pasaran, base sa kumfirmasyon kan Department of Interior and Local Government (DILG).


An ciudad na pigmimidbid bilang centro kan good governance na pigpunan kan panahon ni dipuntong  DILG  Sekretaryo Jesse M. Robredo enot nang nadiskaril sa pigtataong onra kan ahencia kan taon 2015 asin 2017.


Sinabi ni Alcalde Nelson Legacion sa media dai sinda nakapasar sa Financial Administration nin huli ta dai tolos natapos an Saling Tubig Project sa barangay Carolina na an fondo hali sa asistensya finansyal kan DILG.  An proyecto pigpunan pa kan 2016 asin an saro pa sa isyu na dai tolos nabayadan an contratista kan proyecto.


Alagad sa ibang kriterya pasado an City Hall sa pigmamandong rekisitos na kinababalihan kan minasunod: Disaster Preparedness; Peace and order;  Social Protection; Business Friendliness and Competitiveness; Environmental Protection; asin sa Tourism Culture and Arts.


Sa mensaje kan jefe ejecutivo sa atubangan kan mga empleado kan City Hall sa ginibong flag raising ceremony kan Lunes, Oktubre 21 kun dai ninda nakua an onra an mahalaga marhay an saindang  pigtataong serbisyo sa publiko.


Base sa record kan DILG an iba pang ciudades sa Bicol afuera kan Ciudad nin Sorsogon asin Ciudad nin Tabaco an gabos nakawikaw an onra para sa ngonian na taon. Ini kinababalihan kan Ciudades kan Masbate, Legaspi, Iriga, asin Ligao.


Sa anom na provincia kan Bicol solamente an Camarines Norte iyo an nakakua kan SGLG.


Dinagdag pa kan DILG sa lado kan onra para sa gobierno municipal, duwa sana hali sa Camarines Sur na iyo an Tigaon asin Magarao, sarong banwaan sa Albay iyo an Polangui; Paracale, Camarines Norte; Bulusan, Juban, Irosin asin Pilar gabos sa Sorsogon; Virac, Catanduanes.      

Share on Facebook
Share on Twitter
Please reload