Sa atol asin ampao na proyecto binawi

October 24, 2019

Grabe na an ‘’slippage’’ ampao pa an proyecto, ini an resulta kan ginibong inspeksyon kan City Engineer’s Office (CEO) sa P4.5 milyon na riprap project na nacontrata kan Two Brothers Construction na sadiri ni Rey Hernandez.


Si Acting City Engr. Alexander Caning nagpahayag  sa   Bicol  Mail  na antes sinda nagrecomendar ki Alcalde Nelson Legacion na i-terminate na an contrata kan City Hall sa Two Brothers Construction enterong  inikot kan saindang project engineers an 366 na metros na laba kan ‘’Lined Canal at Sagop Tributary’’ alagad apesar na labi nang sarong taon an patrabajo nasa veinte cinco por ciento pa sana an acomplisimiento. Afuera pa kaini, ampao pa sagcod na puedeng magaba man sana an proyecto.


An aksyon kan CEO, irecomendar na ki Alcalde Legacion na dapat i-terminate na sana an proyecto apesar na tinawan na ngani nin extension period alagad nasa veinte por ciento sana an acomplisimiento.


Antes nagpaluwas kan termination order an jefe ejecutivo hinahagadan muna nin paliwanag alagad dai mapatubod an pigrarason na causa iyo an mga pag-uran asin bagyo sagcod na nagdesisyon na i-terminate na an contrata.


An notice to proceed pinaluwas kan Mayo 25, 2018 na dapat matapos an proyecto sa laog nin 270 diyas, apesar kan pinalawig pa an contrata inaabot na nin labing sarong taon dai pa giraray natatapos, sabi pa kan CEO.


Cantidad sanang P1,476.927.88 an nacobrang bayad kan contractor na babawalan na kan City Hall na makaparticipar sa ano man isusubastang proyecto, sabi pa ni Legacion.


Isusubasta giraray an dai tapos na proyecto nganing ipadagos kan iba nang construction firm.    

 
Duwa nang contratista an pina-terminate kan jefe ejecutivo sa laog nin apat na bulan niya sa puesto sa City hall asin an na-enot iyo an R.A. Mendiola Construction na iyo an naka-contrata kan P260 milyon na sanitary land fill huli ta grabe man an slippage kan projecto apesar na tinawan  nin extension period. (dpa)                                                                  

Share on Facebook
Share on Twitter
Please reload