BECA, AGMs MAATUBANG SA SENADO: Aplikasyon sa franquicia kan BLPC dapat ibasura
Protesta kan BECA, AGMs asin empleados kan mga cooperativa asin electricidad sa Bicol laban sa BLPC.
Bako lang sa protesta sa tinampo sa paagi kan regional caravan envez pig-aandaman na kan Bicol Electric Cooperative Association (BECA) asin Association of General Managers kan mga cooperativa nin electricidad sa Bicol nganing mag-atubang sa senate hearing asin ibiklad an saindang panindugan contra sa pribadong korporasyon nin electricidad na matawan nin franquicia sa Rinconada area.
Pig-aandam na ninda an dokumentasyon sa ginibong protesta caravan kan Oktubre 21 na pigparticiparan kan mga cooperativa nin electricidad sa rehiyon cinco nganing isumiter sa senado na nagkakasararo sinda na dapat ibasura an aplikasyon sa franquicia kan Bicol Light and Power Corporation (BLPC) nganing mag-operate sa Rinconada area apesar na igwa pang siyam na taon na franquicia an Camarines Sur III Electric Cooperative (Casureco III).
Si Casureco I General Manager Ann Sylvia Alsisto asin Chairman kan Task Force Duterte sa Casureco III sa Ciudad nin Iriga nagsabi na ipinaheling kan BECA an saindang pusog na pagkontra na matawan nin franquicia an BLPC asin an saindang protesta suportado kan miembros-consumedores asin kan manlaen-laen na sektores.
Afuera pa kaini, an ibang opisyales kan BECA nagsabi na puedeng isunod nindang protesta iyo an pag-pikit sa senado na suportado na kan 120 mga cooperativa nin electricidad sa nasyon.
An House bill No. 407 na yaon na sa senado, an BLPC mapatindog asin mapaconstruhir ma-operate asin mamantenir nin distribution utility sa mga banwaan kan Rinconada area na kinababalihan kan Balatan, Bula, Bato, Baao, Buhi asin Ciudad nin Iriga sagcod na nag-aasegurar nin toltol na serbisyo nin kuryente sa miembros-consumedores alagad duda an publiko sa kakayahan kaini apesar na mayo pa ngani dawa sarong electrical post asin mayo pang kabatiran sa pagpadalagan kan companya nin electricidad.
Sa ginibong protesta sa Ciudad nin Iriga na inatendiran kan ribo-ribong consumedores asin empleados kan cooperativa an saindang kurahaw na dapat ibasura kan senado an aplikasyon sa franquicia kan BLPC na magiging causa sana nin paglangkaw kan tarifa sa kuryente.
An Energy Regulatory Commission (ERC) nagpaluwas nang patanidan na oras na tugotan kan senado an pribadong korporasyon an ferming naiisipan ninda iyo an pagpalangkaw nin tarifa nganing mabawi an saindang dakulang gastos sa pagmantenir nin distribution utility.
Kun sa cooperativa nin electricidad, kontrolado kan ERC an singil sa tarifa asin ano man na rehabilitasyon puede pang pautangon kan National Electrification Administration na dai babawion sa paagi nin paglumpat kan tarifa sa kuryente.
Si Alsisto, presidente kan AGMs nagsabi pa an ginibong pagpalusot sa Camara-baja kan bill dai nag-agi sa consultasyon lalo na sa apektadong miembros-consumedores kan Casureco III.
Si Diputado LRay Villafuerte kan segundo distrito kan Camarines Sur iyo an nag-refiled kan bill na dai nahaloy na aprobaran sa plenaryo kan Septiembre 24 asin ngonian Senate Bill 4437.