Rice tarrification law inapod nang rice manipulation law

October 31, 2019

Igilid na an rice tariffication law ni Presidente Rodrigo Duterte envez mas epektibo na apodon na sa ining rice manipulation law.


Ini an naheheling ngonian kan sektor nin paraoma huli ta puon na iimplementar an ley kan Abril 2019 dai man ini naging paborable sa sektor nin paraoma alagad sa mga rice traders na iyo an nagdidikta kan presyo nin bagas sa mercado.


Si Silvestre ``Ka Silver’’ Bonto, presidente kan National Confederation of Irrigators Association (NCIA) nagpahayag  sa Bicol Mail na apesar na grabe na an suplay nin imported rice sa mercado alagad dai man naghuhuros an presyo kan bagas.


Panahon nang aranihan an   apektado  kan  tariffication law iyo an paraoma huli kan padagos na nagbababa an presyo kan paroy mala ngani digdi sa Camarines Sur nagdadalagan sa P9 hasta P11 an presyo cada kilo.


An administrasyon Duterte pinaboran an rice tariffication law kan an presyo kan bagas sa mercado nagparalangkaw sagcod na iyo an naging causa kan pinakalangkaw na inflation rate kan nagtalikod na taon.
Disnagado an paraoma sa rice tariffication law nin huli ta an pigtitilok sa pagbuhay ngonian iyo an mga dati nang pobreng paraoma alagad si dati nang mayayaman na negosyanteng bagas iyo an mas lalong nag-aasenso sa pagmaniobra kan presyo kan bagas.


Sinabi ni Bonto, apesar na dakul an suplay kan imported rice alagad dai man namamatian kan consumedores an pagbaba kan presyo kan bagas.


Inaalok man ni Bonto an paraoma na baladon asin alangon an saindang paroy nganing ipabakal sa National Food Authority nganing bakalon P19 cada kilo.


Ipinahayag pa kaini, sa ngonian ‘’unlimited’’ na an pagbakal nin paroy kan NFA nganing masusteniran ninda an baratong suplay nin bagas sa mercado na cantidad P27 cada kilo.


Sinabi ni Camarines Sur NFA Provincial Manager Alan Sabaybay na regular na an saindang ginigibong pagdistribusyon nin NFA rice sa mercado nganing igwang baratong presyong bagas na mababakal an consumedores.


Sa ngonian an commercial rice nagdadalagan sa presyong P35 hasta P48. (dpa)
 

Share on Facebook
Share on Twitter
Please reload