SA BICOL INTERNATIONAL AIRPORT: Runway dapat kalkalon

November 7, 2019

Pinapaheling sa Bicol Mail ni Usec Marvel Clavecilla an rarum kan sample sa ginibong boring test sa mga krak kan runway sa Bicol International Airport. (DPA) 

 

 

Naprobaran kan Technical Working Group (TWG) kan Office of the Presidential Adviser for Bicol Affairs (OPABA) na igwang depekto an bilyones pesos na Bicol International Airport (BIA) sa Daraga, Albay matapos kan saindang ginibong boring test na igwang mga krak an runway asin an rekomendasyon dapat kalkalon.
 

Si dating Juez asin Presidential Adviser for Bicol Affairs Marvel Clavecilla  nagpahayag sa Bicol Mail na igwa na sindang nakuang mga evidencia na dara kan saindang duwang Enhinyero kan TWG na sinda Frank Naval asin Luis Zamudio na iyo an nagconducir nin boring test kan runway sa Alobo, Daraga, Albay.


Apat na mga sample nin boring  test  an saindang kinua sa dos kilometros na laba kan runway na nahelingan  nin  mga depekto na dakul an mga krak asin naheling ninda an klase kan proyecto.


An  ginibong  boring  test kan TWG nganing maaraman kun gurano kararum an krak kan proyecto. 


An OPABA binugtak kan Malacañan sa Bicol tanganing iyo an mag-monitor kan mga proyecto sa infrastraktura sa Department of Public Works and Highways (DPWH) asin sa Department of Tranportation (DOTr) mantang saro sa prioridad  kan administrasyon Duterte iyo an Build-Build-Build program.


Nag-aandam na an OPABA sa paghaman nin rekomendasyon na isusumiter ki Presidente Duterte asin man ki DOTr Secretary Arthur Tugade para sa saindang aksyon.


An problema sa patrabajo bako lang sa depektibong runway envez igwa pang sisimbagon sa slippage asin posibleng dai matapos sa target completion na pigtalaan sa Noviembre 2020.


Saro sa pueding maging aksyon na kalkalon giraray an runway asin kun dai ini gigibohon delicado sa mga aksidente sa pag-landing kan mga eroplano, sabi pa ni Clavecilla.


‘’Recommendatory sana an OPABA asin piglalaoman na dapat mag-aksyon digdi an DOTr’’ segun pa sa OPABA.


Delicado an impact kun ma-landing an eroplano na 747 sa mga krak na runway.


Duwa an kontratista kan BIA na kinababalihan kan Cuerpo Construction Corporation asin an San West Construction Corp. na sadiri ni Saldy Co iyo an nakacontrata sa runway.


Namumundo an OPABA sa dakulang proyecto kan gobierno nasyonal na mawot ni Duterte matapos sa target completion alagad igwang problema sa runway na dapat pakarhayon kan kontratista. (DPA)

Share on Facebook
Share on Twitter
Please reload