SA MGA APEKTADO KAN RTL: DA Bicol mabariwas nin cash sa manga paraoma

Pili, Camarines Sur – Matao nin ayudang P5 mil na cash an Department of Agriculture (DA) sa Bicol sa ribo-ribong mga paraoma na padagos na apektado kan hababang presyo kan paroy epekto kan Rice Tariffication Law (RTL).

Afuera kan P15 mil na ipapa-utang sa lindong kan Expanded Survival and Recovery Assistance (SURE) program, matao nin libreng tig-a cinco mil pesos na cash sa cada paraoma.

Alagad sinabi ni Emily Bordado, regional spokesperson kan DA Bicol na kabali sa mga benipisyaryo iyo si nag-ooma nin sarong hektarya pababa.

Sa ceremonial distributions maabot sa 6 mil na paraoma muna an pigtalaan na makarecibe sa enot na semana kan Deciembre 2019 na puedeng gibohon sa DA Bicol o kun dai man sa Convention Center kan Capitolyo Provincial sa Camarines Sur.

Maabot sa cincuenta mil (50,000) na paraoma sa Bicol an kalificado na saindang babasehan an listahan kan Registry System for Basic Sector and Agriculture (RSBA).

Sa RTL, nag-alokar nin diez bilyon pesos an gobierno nganing itabang sa paraoma sa paagi kan libreng banhi, farm machineries na an training sa paagi kan TESDA, loan asin mga makinarya, sabi pa ni Bordado.

Sa SURE program an quince mil pesos na ipapa-utang babayadan sa laog nin walong taon na mayong por ciento asin dapat magbayad nin P1,000 mil cada anom na bulan.

An mga makaka-aprobetsar kaini si paraoma na inabot nin hababang presyo kan paroy huli kan RTL.

(DPAureus)