Ram Samar urgolyo na harani ki Duterte

Apesar na haloy nang ‘’wanted’’ kan saiyang mga investor alagad nagprobar pang mag-apply nin trabajo sa administrasyon Duterte alagad kan magkua nin clearance sa National Bureau Investigation (NBI), dai na nakalusot.

Si Ramiro ‘’Ram’’ Samar y Imperial nakuanan nin entrevista kan Bicol Mail mientras na detenido sa Municipal Jail kan Milaor Municipal Police Station, nagpahayag huli sa kawaran niya nin trabajo nag-apply sa gobierno asin nagkua nin clearance sa NBI alagad dai na nakalusot huli sa saiyang caso.

Pig-uurgolyo ni Samar na harani siya ki Duterte mantang kan nakaaging presidential election saiya ining pigsuportaran dawa na ngani dai man nang-gana sa resulta kan eleksyon digdi sa Bicol.

Nagtutubod kuta siya na makakalaog siya nin trabajo sa administrasyon Duterte alagad dai niya pigheling na igwa palang siya nin record na caso sa NBI.

Kinumfirmar ni Presidential Adviser for Bicol Affairs, Marvel Clavecilla na si Samar nagsuporta sa candidatura ni Duterte kan nakaaging election presidential.

Dakul na mga investor ni Samar sa Ciudad nin Naga asin Camarines Sur an naghahanap sa saiya huli sa investment scam alagad nadakop kan mga pulis kan Milaor, Camarines Sur kan Noviembre 1, 2019 huli sa 29 counts sa violation of Batas Pambansa 22.

An mandamiento de aresto hali sa Metropolitan Trial Court, sa Ciudad nin Quezon, Metro Manila huli sa caso sa BP 22.

Siyam na mga complainant an nagsangat nin syndicated estafa huli sa kulang si elemento sagcod binaba kan corte sa BP 22.

Dai ko envuelto sa investment scam, kun igwa man iyan sa BP 22, sabi pa ni Samar. (dpa)