Naga bagsakan basura

November 14, 2019

Sa retrato sa itaas nasa too si Bagumbayan Norte, Punong Barangay asin ex-officio member kan Sangguniang Panlungsod Antonio Beltran kaibahan an personaje kan SWMO pigheheling an mga tinambak na basura sa linderos kan Queborac, Bagumbayan Norte asin Camaligan, Camarines Sur asin sa linderos kan Brgy. Taculod, Canaman.  

 

 

Disganado an City Hall sa ibang pagtaraid na municipio huli ta padagos na ginigibong apunan nin basura an mga linderos kan ciudad apesar kan mga ginigibong pakiulay kan opisyales de barangay sa mga residentes na aroaldaw nagbabagsak nin basura.

 

An aksyon kan ciudad nagpasar nin ordinansa na binabawalan an mga bakong residentes kan ciudad na gibohon apunan nin basura an Naga, sabi ni Consejal Antonio Beltran asin ex-officio member sa Sangguniang Panlungsod na nagrerepresentar kan Liga ng mga Barangay.


Saiyang pinangenotan an pagpasar kan ordinansa na may titulong ‘’An ordinance prohibiting non-residentes of the City of Naga from disposing their domestic waste into any portion of the territorial jurisdiction of Naga City and providing penalties for violations thereof’’.


Sinabi ni Consejal Beltran na Joint and collective motion an ordinansa asin  pirma nalang ni Alcalde Nelson Legacion tanganing iimplementar alagad papadarahan nin kopya kan ordinansa an pagtaraid na LGUs.


Sa ordinansa dai naman pigbuyagyag kun anong mga banwaan an mga nag-aapon nin basura sa ciudad.


Ma-imponer nin penalidad an City Hall base sa ordinansa, sa premirong pagbalga cantidad P2,000.00; sa ika-duwang pagbalga P3,000.00;  asin sa ika-tolong veces nang pagbalga cantidad P5,000.00 asin sagcod na malaom sa carcel  depende sa diskreasyon kan corte.

 

MAAGAHON PIGBABAGSAK AN MGA BASURA

 

Si Beltran, Punong Barangay kan Bagumbayan Norte, Ciudad nin Naga nag-osipon pa sa Bicol Mail permi siyang nagbabangon dawa alanganin nin oras puon ala una nin maagahon sagcod alas tres nin maagahon sagcod nagkapera nang veces niyang inabotan nganing pakiulayan na magpundo na pag-bagsak nin dagman na basura sa linderos kan ciudad.


Perang taon nang ginigibong bagsakan nin basura an ciudad alagad sa ngonian dai na sinda makakalibre sa caso, sabi pa sa patanid ni Beltran.


Saro sa lugar na nasikop niya si nag-aapon nin basura sa Queborac, Bagumbayan hali pa sa Canaman asin Camaligan, Camarines Sur.


Pinakiulayan niya na pumundo na magbagsak nin basura sa laog kan ciudad alagad an simbag sa saiya na nagbabayad man sinda nin buhis huli ta digdi sa Naga nagsasaog.


Hinahanapan nin ordinansa an Punong Barangay kan pasaway na persona. Huli kaini, igwa nang ordinansa an City Hall nganing estrictong iimplementar asin dakopon an masinutil, sabi pa.


Dinagdag pa ni Beltran kabali sa mga lugar na ginigibong tambakan nin basura iyo an linderos kan Abella, Mabulo, Tabuco asin sa Cockbill sakop kan barangay San Felipe.

 

 KADAKLI KAN LGUs NADIDIFICILAN
MAG-IMPLEMENTAR KAN RA 9003

 

Puon pa kan taon 2001 igwa nang dapat na sunodon an  LGUs  na Acta Republica 9003 o mas midbid  sa ‘’Ecologial Solid Waste Management Act of 2001 alagad kadakli kan ibang mga lokal na gobierno nadidificilan iimplementar kan ley.


An City Hall igwa nang sanitary land fill sa barangay San Isidro na naging operational pa sana kan Agosto 2019.


Si Engr. Joel Martin, jefe kan Solid Waste Management  Office nagsabi saindang estrictong pig-iimplementar an ‘’No segregation, no collection policy’’ nganing  dai  mapano tolos an sanitary land fill.


Alagad an toneladang basura hali sa pagtaraig na banwaan kan ciudad haralo na dai man tatao magsunod kan pagsuhay kan nalalapa asin dai nalalapang basura. (dpa)

Share on Facebook
Share on Twitter
Please reload