Towing ordinance iimplementar sa Enero 2020

Nag-aandam na an lokal na gobierno kan Ciudad nin Naga nganing iimplementar na an expanded wheel-clamp asin towing ordinance sa Enero 2020 sa mga vehiculos na naggagaraje sa mga binabawal na tinampo sa commercial district asin sa iba pang barangay na yaon sa centro kan ciudad.

Si Rene Gumba, jefe kan Public Safety Office (PSO) kan City Hall nagpahayag sa Bicol Mail na igwa nang towing company alagad dai pa ma-implementar ngonian na taon mantang kaipuhan pag-andam an mga traffic sign sa mga lugar kan expanded wheel-clamp ordinance asin magkakaigwa pa nin information drive an ciudad.

Ini nganing dai maging sarahotan kan mga masinutil sa ordinansa na dai sinda nag-aaram dawa igwa nang enot na mga publicidad kaini kan nagtalikod na taon na dapat iimplementar kan Agosto 1, 2018.

Iginilid an implementasyon kan ordinansa nin huli ta mayo pang towing company asin lote na gigibohon na impounding area kan magugoyod na vehiculos.

Sinabi pa ni Gumba an towing company na nagpahayag kan saindang intensyon na magcontrata sa City Hall iyo an Maxicam Body and Bumper na sadiri ni Maximo Camacho.

Namumugtak an saindang impounding area sa Bagumbayan Sur asin sainda nang pigpapakarhay an lugar na may hiwas nin labi sa tres mil metros cuadrado an lote.

An ordinansa na aprobaran sa Sangguniang Panlungsod kan Mayo 2, 2018 kan panahon ni dating Alcalde John Bongat dapat iimplementar kan Agosto 1, 2018 alagad huli kan mga kaulangan pig-uktaba muna.

An ordinansa may titulong ‘’An ordinance amending city ordinance No. 2006-065, by expanding the wheel-clamp ordinance and authorizing the towing of abandoned, stalled and illegally parked vehicles, providing guidelines for dispositions of towed autobiles, and imposing penalties for violations thereof.’’

An mga magkaka-darakop mamulta nin P1,500 hasta P5,000 asin igwa pang dugang na bayad sa pagbutong kan vehiculos pasiring sa impounding area. (DPAureus)