Inbestigasyon sa depektibong runway, isusumiter na sa DOTr

Isusumiter na kan Office of the Presidential Adviser for Bicol Affairs (OPABA) sa Department of transportation (DOTr) an saindang rekomendasyon asin findings sa ginibong inbestigasyon sa depektibong runway kan Bicol International Airport (BIA) sa Daraga, Albay.

An technical Working Group (TWG) kan OPABA na sinda Engr. Frank Naval asin Engr. Luis Zamudio nakumfirmar kan mga krak sa concretong runway matapos kan ginibong boring test asin ini peligroso sa aksidente sa pag- landing kan eroplano.

Si dating Juez asin Presidential Adviser for Bicol Affairs Marvel Clavecilla nagpahayag sa entrevista kan Bicol Mail na saro sa saindang prueba iyo an mga krak sa kinuang tolong sample sa boring test sa Alobo, Daragay, Albay.

Talagang may depekto an pag-construhir kan runway, alagad an OPABA an saindang trabajo mag-monitor kan mga proyecto sa Build, Build, Build (BBB) program ni Presidente Rodrigo Duterte asin ipadara an rekomendasyon envez an aksyon sa nadadapat na ahencia arog kan isyu sa BIA yaon sa jurisdiksyon kan DOTr, sabi pa ni Clavecilla.

Afuera pa kaini, an TWG mapasiring ngonian na semana sa PHIVOLCS sa Ciudad nin Legazpi tanganing maghagad nin certificasyon kun an sinambit na runway nasa earthquake fault, ano ta naggagaratak tolos apesar na bago pa an proyecto.

Ngonian na Viernes, segun ki Clavecilla saindang ma-aaram an resulta sa pag-aadal kun earthquake fault an lugar kan BIA.

An BIA pinabulosan nin P4,798.00 bilyon na namumugtak sa Daraga, Albay mantang dapat matapos kan duwang contratista sa 2022 na sagcod sa ngonian nagpapadagos pa an implementasyon.

An iba pang BBB program kan administrasyon Duterte iyo an Pasacao-Balatan Tourism Coastal Highway sa Camarines Sur, Quezon-Bicol Expressway asin an PNR South Long Haul. (DPA)