1,710 na mga harong sa CSur ginaba ni ‘Tisoy’

Pili, Camarines Sur – Nagwalat nin 1,710 na mga pinatumba asin parsyal na daños na mga harong si bagyong ‘Tisoy’ sa Camarines Sur kan maglamasa an bagyo kan Martes na maagahon asin ribo-ribo an mga evacuees hali sa mga coastal na banwaan asin kababan na barangay.

Ini an partial report kan Provincial Disaster Risk Reduction Management Council (PDRRMC) kan Capiltyo Provincial kan Camarines Sur sagcod kasoodmang Miercules, Deciembre 4.

Si Ana-Liza Macatangay, jefe kan PIA asin opisyal na parataram kan PDRRMC nagpahayag sa Bicol Mail na igwa nang 1,382 mga partial damage na harong asin total damage 328 na mga harong hali sa 102 barangay alagad inisyal pa sana ini mantang nagkaigwa nin problema sa kumicasyon huli kan kawaran nin signal sa telcos alagad igwa sindang karibay na VHF radio facility.

Kadakli sa may halangkaw na numero nin daños sa mga harong iyo an Cabusao, Sipocot, Lupi, Libmanan asin Pasacao.

Mayo pang inpormasyon na binawian nin buhay alagad igwang nagadan matapos makuryente sa atop kan saindang residencia na pig-aaram pa kun ini causa pa kan nakaaging calamidad.

Pighahalat pa kan PDRRMC an mga damage report sa agricultura hali sa Department of Agriculture asin infrastractura hali sa Department of Public Works and Highway, alagad nagtutubod an consejo posibleng mayo man nin daños sa sa infrastraktura.

Sa Office of Civil Defense, ipinahayag ni Claudio Yucot haros an gabos na provincia sa Kabikolan an apektado kan nakaaging calamidad.

Sa inisyal na report sa daños sa agricultura, ipinahayag na maabot sa 400 hektaryang kaomahan an nadestroso si mga tinanum nin paroy matapos lantopan nin tubig baha.

Piglalaoman na tutugotan na kan Philippine Coast Guard an viaje sa dagat matapos magkulpa asin mayo nang pigdeclarang gale warning an PAGASA.

An mga PDRRMC tinatapos pa an pinal na damage report kun kinakaipuhan magdeclara nin state of calamity an saindang LGU.