Bagyo, Baha/ Karawat asin Kalamidad

December 6, 2019

 

Arog kan SEA Games na nagbugkos kan mga Pilipino, si Tisoy, an bagyo nagbunyog kan mga Bikolano.


Pambihira ta ngonyan lang naaraman ko na an anom na provincias asin pitong ciudades kan Kabikolan may pig-itaas na sinyal numero 1 asin numero 2 , makusog an duros, makusog an uran na dara kan bagyong si Tisoy.


Arog kan dati  na an bagyong minaagui sa Bikol, minatugpa muna sa Catanduanes dangan sa banwaan kan Presentacion Partido pasiring sa parteng Naga an mata sagkod na magluwas sa Pilipinas via Southern Luzon, Kamaynilaan sagkod na sa South China Sea.


Ngonyan na taon 2019 ini an mayor na kalamidad na nag-agui sa Bikol patapuson na pati an taon.


Magayon an resultado kan SEA Games, makolor si opening. Primerong aldaw kan karawat tambak na medalya tulos an nakua kan mga Pilipinong atleta (bulawan, perak, asin bronse). Sa laog nin sarong semana untok si mga kritiko kan SEA Games asin kan gobyerno Duterte, lakop an kaorogmahan kan mga Pilipino bako lang sa Metro Manila kundi pati sa ibang lugar na may karawat sa Central Luzon, La Union, New Clark City  asin iba pang lugar sa Pilipinas.


(Igwa lang sarong pasaway na DJ kan sarong dakulang broadcast network sa Bikol an nag-post sa Fb na maski daa magayon si opening asin mga karawat kan SEA Games pero para saiya idto “lapa” ta nasa likod kan proyekto  an gobyerno na bako niyang kaalyado).


Mientras na an mga Pilipino nag-oorogma sa pagdalan kan SEA Games poon sa grand opening duman sa Philippine Arena sa Bulacan, an mga Bikolano poon Catanduanes, Albay, Cam. Sur, Cam. Norte, Sorsogon asin Masbate nagkakasiribot man asin nagkakaharadit mantang palaogon sa rona an bagyong mestizo dai aram kun maputi o maitom pero an bansag Tisoy. An sigurado basa. Kan dekada 50, 60, 70, 80 an pig-aapod na typhoon belt iyo an Bikol. An mga Bikolano tood na sa bagyo pirang beses sa sarong taon, may bunos pang baha sa kababan pero bago sulayan kan mga Bikolano an saradit nindang harong enot na tinutukudan an mga poon kan sili. Kadto kan mayo pang PAGASA, mayo pa si Mike  V. Padua, an mga gurang natutudan nanggad an nagdadangadang na kalamidad por medyo kan mga hiro-hero kan mga hayop asin insekto arog kan nagraralayog na pato asin  itik, nagpapara-atungal na mga ido, sabay-sabay na nag-ruruluwas sa bungag an mga kino asin halas.


An mga bagtingan kan mga simbahan sige-sige an repeke sa tahaw kan linog asin uran, asin hararom na baha.


Ngonyan sa lindong kan bagong teknolohiya an nagdadangadang na bagyo antes mag-abot sa kadagaan aram na kan PAGASA asin ni Mike Padua asin kan publiko mismo. Basta igwang radyo, telebisyon asin cellphone dai ka mahuhuri sa bareta.


An dai lang matudan kan bagong teknolohiya iyo an paglinog, kasulo, pagtuga kan bulkan. An pagbaha, an pagtiris kan daga bunga kan bagyo asin makusog na uran kaya pwedeng maibitaran bastang an mga tao magtubod sa mga pabantulin kan awtoridad na mag-ibakwar  hali sa hababa pasiring sa mga halangkaw asin salbadong lugar.


NDRRMC(National Disaster Risk Reduction Management Council) is the name an pag-asa kan bayan. 
An dai maibitaran sa baha iyo an alipong, leptospirosis, asin an tentasyon na magparalamutaw asin maglangoy-langoy.


Pero dai bale na ta an buhay balansiyado, an kaogmahan asin kamunduan, hadit, takot asin ogma, engrandeng kaorogmahan sa tahaw kan makusog na uran asin duros wara an problema kan kinaban.


Mabuhay an burunyog na Bikolano!!!


Mabuhay an burugkos asin sararong Pilipino!!!
* * *
An “re-development” kan Plaza Rizal (Freedom Park) kan Naga lalo na an paggaba kan skating Rink na pinagibo ni LRV nagpapaheling na suhay na talaga an Naga sa Camarines Sur. Nagsugo na kaya an korte na an mamanehar sa aktibidades sa laog kan Plaza Rizal iyo an LGU Naga bako an Camarines Sur.


An Plaza na nasa atubangan kan daan na Kapitolyo provincial pigpairahay pa asin pinagayon poon kan 1994, pigpacemento ta lapok na kadto, pigbugtakan gazzebo (kahadian kan mga butang parahilot), pigpa tiles an pamitisan ni Rizal, pigbugtakan C.R., sa lindong kan administrasyon kadto ni Gobernador Nonoy Bulaong.


Kundi sa mga kaso-kaso entre kan provincia asin ciudad napasakamot na lugod kan Naga an pagpadalagan kan Plaza.


Dai tabi kalingawan ni Mayor Nelson Legacion, taga Bula o taga Buhi man siya, na maski chartered city an Naga, indepiendiente sa Cam. Sur dai nagboboto  nin Gobernador pero an tao sa Naga kun aldaw dominado kan mga taga Cam. Sur---estudyante, empleyado, parasaod, parasimba, parasine asin iba pa.

 

Kun aldaw haros kabangang milyon an tao sa Naga alagad kun banggui pagnagpuruli na sa Cam. Sur an populasyon, 150 mil na sana  an populasyon kan ciudad kaya dai nanguiguin highly urbanized city an Naga.


90% kan produktong agricultural sa Naga public market hali sa mga banwaan kan Camarines Sur kaya  an nagpapakakan kan Nagueno iyo an provincia nin Camarines Sur. An Plaza Rizal,  sabi kadto ni Gobernor Bulaong iyo an embahada, pasyaran, asin estambayan kan mga taga-Camarines Sur kun rayaon sinda sa Naga.
* * *
Mag-antabay sa programang “INI AN TOTOO” kada Sabadong alas 8:30-9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Winnie Ceas-Ventura     and Ernie Verdadero.


May mga espesyal na bisita.  


Diyos mabalos.   


For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero


Website: www.bicolmail.net

Share on Facebook
Share on Twitter
Please reload