NFA sa Bicol binabaha na nin paroy

December 6, 2019

Binabaha nin paroy an mga bodega kan National Food Authority sa anom na provincia sa Bicol mantang aroaldaw an nakapilang mga truck asin jeepney na pano-pano nin paroy hali sa mga paraoma na piglalamag na digdi an halangkaw presyo sa cantidad na P19 cada kilo kumpara sa pribadong kumprador na nagdadalagan an presyo sa P10 hasta P12.


Ini an mga pahayag ni Henry Tristeza, NFA regional manager sa pigpadrenohan na Media Briefing sa Rice Awareness Month kan Departmento de Agricultura na ginibo sa Villa Caceres Hotel, Ciudad nin Naga.


Inaabot nin alas 8:00 nin banggui an pagpisar kan sinakong paroy sagcod na kinakapoy na an empleados asin mga bodegero  ngani sanang idiskarga sa bodega asin inaabot na nin duwang aldaw antes maubos an nakapilang truck asin jeepney.


Hinahagad na ni Tristeza sa mga paraoma nganing dai maabala dapat duwang aldaw antes darahon an paroy magpalista na nin amay. 


Nakatalaan mag-arkila nin pribadong bodega an NFA tanganing iyo an sarayan kan rinibong sakong paroy.


An NFA Bicol nag-alokar nin P700 milyon  ngonian na taon para sa procurement program nin paroy kasunod kan direktiva ni Presidente Rodrigo Duterte na dapat bakalon kan ahencia an paroy mga paraoma nganing dai malugi sa baratong presyo sa pribadong kumprador.


Piglinaw kan ahencia dapat alang an saindang pigbabakal na paroy sa presyong P19 cada kilo. 


‘‘Unlimited’’ an saindang pagbakal nin paroy alagad an problema napapano na an mga bodega, sabi pa ni Tristeza.


Sa ngonian igwa nang 33 na buying stations an NFA Bicol para recibihon an gabos na lokal na produkto.


Dai na nag-aangkat nin bagas an ahencia asin nasa 80 mil na sanang cavan an imported rice sa 200,000 na stock nin bagas sa rehiyon.


An tolong mga provincia sa  rehiyon na may halangkaw nin produksyon nin paroy iyo an Camarines Sur na may 70 mil hektaryang omahan, Albay – 33 mil hektarya asin Sorsogon – 22 mil hektarya.


Ipinahayag pa base sa records kan Philippine Statistics Authority (PSA) igwang total na 164 mil hektarya nin omahan. (DPAureus)

Share on Facebook
Share on Twitter
Please reload