P1.4B propuestong annual budget kan LGU Naga sa 2020

An Sangguniang Panlungsod kan Ciudad nin Naga nagcierto na saindang tataposon an delibersyon kan P1,409,321.980 annual budget kan ciudad para sa taon 2020 nganing maaprobaran antes matapos an bulan nin Deciembre 2019.

Si Bise Alcalde Cecilia ‘Nene’ De Asis, presiding officer kan SP nagpahayag sa Bicol Mail kasuodma na hahawason sa committee on finance and appropriation sa pamamayo ni Consejal Ghiel Rosales an ginigibong pagserne kan executive budget na pigsumiter ni Alcalde Nelson Legacion.

Hali sa dating P1.2 bilyon na 2019 annual budget alagad nurong taon nagsakat na ini sa P1.4 bilyon annual budget alagad kun naglangkaw nin maabot sa P300 milyon bako sa iimponer na dugang na buhis envez hali sa mga projected 2020 revenue kan economic enterprise na kinababalihan kan Bicol Central Station, Naga City People’s Mall, City College of Naga, asin Naga City Abattoir.

Si Consejal Rosales bilang chairman kan appropriation committee nagpahayag na mayo naman siyang naheheling na maabala an pag-aprobar kan saiyang pagiriba sa SP nganing pagtungtong kan 2020 igwa nang bagong annual budget sa pag-implementar nin mga programa asin proyecto kan City Hall.

Sa prosupuesto sa personal services magkakaigwa nin P502.202 milyon o 36 por ciento kan total mientras an Maintenance and other operating expenses magkakaigwa man nin P614.234 milyon o 43 por ciento. An iba sa P1.409 milyon na executive budget para sa capital expenditures for development projects asin mandatory appropriations, particulamente sa special purpose appropriations nagcacantidad nin P49.385 milyon. Local development fund – P174 milyon, local disaster risk reduction and management – P69.500 milyon. (dpa)