Sentido komon gamiton kan environmentalist, sabi

December 20, 2019

Puon na kahoy na tinumba kan makusog na bagyong Tisoy nagcausa nin ulang sa bulos nin trafico. (dpa)
 

 

Panahon nang iimplementar kan Camarines Sur Electric Cooperative (Casureco II) Inc. an pagputol nin puon nin mga kahoy na nakakaulang asin nagiging causa nin daños sa mga poste asin linya kan cooperativa kun naglalamasa an makusog na bagyo.


Si mga nagcontrang environmentalist dapat  gamiton an ‘’sentido komon’’.


Si Consejal Salvador Del Castillo, pamayo kan environment committee sa Sangguniang Panlungsod sa Ciudad nin Naga nagsabi na igwa nang Acta Republica 11361 na mas midbid  sa bilang ‘’The Anti-Obstruction of Power Lines’’ na awtorisado na an mga cooperativa nin electricidad na magputol kan mga kahoy dawa mayong permit sa DENR, sa mga poste na makakaapektar sa poste asin linya. An bagong ley inaprobaran ni Presidente Rodrigo Duterte dai palang nahahaloy.


Si Casureco II si OIC General Manager Emelita Candia nagsabi na mayo nang grupo na macontra kan saindang trabajo na putolon an mga kahoy na makakadanyar sa linya kan cooperativa nin electricidad.


Kan nakaaging calamidad 80 por cientong kan  268 nabuhal na puon nin kahoy nakadestroso sa saindang mga linya sagcod naging causa kan halawig na kawaran nin suplay kuryente.


Tinuyaw ni Del Castillo an grupo kan environmentalists na nagparacontra sa pagputol nin kahoy sa road right of way asin afuera pa kaini delicado pa sa mga poste asin kuryente kan Casureco II.


An mga kahoy dapat sa bukid bako sa tinampo mala naheling si resulta kan  daños kan nakaaging bagyong Tisoy dakula si destroso sa mga cooperativa nin electricidad sagcod naging causa kan abalang pagsuplay nin kuryente sa miembros-consumedores.


Naging causa pa kan ulang sa viaje huli ta si mga kahoy natumba sa tahaw kan tinampo, haen na si mga environmentalists?


‘’Sentido komon’’, an kahoy dapat sa bukid bako sa tinampo na causa pa nin aksidente asin destroso’’ sabi pa sa pangapudan kan consejal  sa  mga nagsasaging-saging environmentalists.


An Department of Public  Works  and Highways (DPWH) nag-implementar kan road widening project alagad dai natapos huli kan pagcontra kan sinambit na grupo apesar na an mga kahoy na dapat putolon yaon sa laog kan road right of way.


An corte nag-isyu nin temporary environmental protection order contra sa DPWH asin DENR na putolon an mga kahoy na yaon sa gilid kan tinampo, ini kasunod kan pigsangat na petisyon kan environmentalists.


Haen na sinda matapos kan bagyo dai man nagpaheling na magtabang sa pagpabangon kan natumbang mga poste, sabi pa kan consejal.

Share on Facebook
Share on Twitter
Please reload