Grupo kan Badjao sinapwat kan CSWDO

Pinunan na kan City Social Welfare and Development Office (CSWDO) kan lokal na gobierno kan Ciudad nin Naga an pagsapwat kan mga nagbabaraybasay na Badjao sa centro de negosyo nganing saindang pabueltahon sa saindang estada sa coastal na barangay kan Pasacao, Camarines Sur.

Kan nakaaging Viernes, Deciembre 13 maabot sa 150 mga Badjao an saindang dinarakop asin piglunad sa vehiculo na dagos nang pinauli sa coastal na barangay kan Pasacao na yaon digdi an saindang estada.

Sinabi ni Eden San Andres, community affairs assistant kan CSWDO an saindang aksyon sa tahaw kan mga reklamo kan mga negosyante kabali na si may kagsadiri nin restaurant huli ta nadidisturbo an saindang mga customer dawa alanganing fuersahan an pakilimos.

Kun panahon nin Peñafrancia fiesta asin mapasko dakul an mga naglalaog na grupo nin Badjao sa ciudad alagad ini bako lang problema digdi maging sa iba pang mga ciudades na iyo man an hinahanap kan grupo na golpi an tawo nganing makilimos.

Puon pa kan bulan nin Septiembre, Noviembre asin ngonian na enot na semana kan Deciembre dakul na an pigsapwat kan CSWDO na mga Badjao na dawa sain na mga gilid nagtuturog.

Usmak sinda dawa sain nag-aati asin nakaka-isip mag-sex dawa igwang mga nagheheling na menor de edad sige sana, sabi pa.

An Badjao tuod mabuhay sa dagat asin digdi na nag-aarate sagcod na dai pa tatao magkarigos.

Kaipuhan sindang matawan nin edukasyon kan gobierno asin matabangan nganing mapatama an saindang kamugtakan sa pagbuhay, segun pa sa CSWDO.

Tatao na magtaram nin Bicol huli ta perang taon na sinda nag-eerok sa Pasacao.

An sombong kan ibang residentes sa Pasacao na nagparadakul an grupo huli ta igwang politico digdi tinugotan sinda na magparehistro sa Comelec nganing makaboto pabor sa sarong dating halangkaw na opisyal kan banwaan. (dpa)