Ribo-ribo mga puon nin kahoy dai papasalbaron kan Casureco II

December 27, 2019

Ribo-ribo mga puon nin kahoy sa sakop na mga municipalidad kan Camarines Sur II Electric Cooperative II (Casureco II) Inc. an nakatalaan purotulon sa ika-duwang cuarto sa masunod na taon 2020 nganing sainda nang iimplementar an Acta Republika No. 11361, na mas midbid sa ‘’The Anti-Obstruction of Power Lines Act’’ na nag-aawtorisar sa mga cooperativa nin electricidad  na  magputol nin  kahoy na dai na kaipuhan an tree cutting permit hali sa Department of Environment and Natural Resources (DENR).


Napapanahon nang mahali an mga puon nin kahoy na nakaka-apektar sa mga electrical post asin mga linya kan cooperativa na nagiging causa nin dakulang daños asin halawig na mga brown out, sabi ni Rinner Bucay an opisyal na parataram kan Casureco II.


Kan nakaaging bagyong Tisoy ginatos na mga poste asin naraot na mga linya kan mabuhal an puon nin kahoy sagcod na naging resulta kan halawig na brownout asin danos sa manijamiento.


Igwa nang RA 11361 mayo nang sagabal na macontra sa pagputol nin mga kahoy nin huli ta dai nang kaulangan dawa darahon naman sa corte kan grupo nin environmentalists.


An mga banwaan na sakop kan Casureco II na dakul an mga puon nin kahoy na dapat putolon iyo an Calabanga, Siruma-Tinambac district, Bombon, Magarao, Canaman, Camaligan, Pili, Milaor, Minalabac asin Ciudad nin Naga.


Sinabi kan Casureco II na base sa seksyon 7 kan acta republica puedeng ipadagos ninda an pagpurotol kan ulang na sanga, pagputol kan mga kahoy maging puon nin niyog na dai na kaipuhan an DENR permit alagad kun sa puon nin niyog ipaaram sana sa Philippine Coconut Authority (PCA).


An cooperativa asin an 3rd Engineering District kan DPWH sa Camarines Sur nakakua nin in tree cutting permit hali sa DENR alagad naulang huli kan temporary environmental protection order (TEPO) kan jusgado pabor sa petisyon na pigsangat na caso kan environmentalist.


Kun pig-ulang an pagputol kan DPWH alagad si bagyong Tisoy iyo na an nagpatumba kan pigrereclamong mga kahoy alagad dakula si destroso sa Casureco II, sabi pa. (dpa)

 

POSTE DAI HINAHALI. Inabot na nin Pasko matapos kan bagyong Tisoy kan Deciembre 2 an residenciang ini kan familia Lara sa brgy. San Felipe, Ciudad nin Naga padagos nadadatugan kan poste nin kuryente kan Casureco II asin Telco. Pigreclamo na kan miembro-consumedores kan cooperativa malaog na an bagong  taon alagad mayo pang  ginigibong aksyon. (dpa)                                                              

Share on Facebook
Share on Twitter
Please reload