SA PROBLEMA SA TRAFICO KAN ANDAYA HIGHWAY: Solusyon bakong barasulan - OPABA

Temporaryo muna an pagbuelta sa two way sa Andaya Highway alagad an posibleng problema sa pagkagurbot kan trafico digdi mangyari naman sa enot na semana kan Enero 2020.


Alagad an Office of the Presidential Assistant for Bicol Affairs (OPABA) sa pamamayo ni Usec Marvel Clavecilla, Land Transportation Office (LTO), DPWH, PNP, Phil. Army, Highway Patrol Group asin iba pang ahencia de gobierno nagkasurondo na magcrear nin Task Force Andaya Highway nganing maghaman nin mga plano sa piglalaoman na pagbuelta kan kaparejong problema sa pagbaralikan sa Manila kan mga bakasyonista hali digdi sa Bicol asin Visayas.

Hinagad ni Clavecilla na isikwal na an barasulan sa problema envez magtarabangan sa paghanap nin solusyon.

An lambang ahencia magkakaigwa kan saindang mga kanya-kanyang obligasyon nganing maseguro na mantenir an dalagan kan trafico na si dating 10 oras na viaje inaabot na nin 15 oras haling Manila pasiring sa Bicol nin huli kan abalang reblocking project kan contratista kan DPWH sa Brgy. Beguito Libmanan asin Sipocot.


TASK FORCE. Pinangenotan ni Usec Marvel Clavecilla (sa tahaw) asin iba pang mga ahencia de gobierno an urulay kan Task Force Andaya Highway nganing magpanday nin mga estratihiya sa problema sa trafico sa Sipocot-Libmanan mientras na nagpapadagos pa an reblocking project. (DPAureus)


Saro sa nahaman na temporaryong solusyon sa pagbuelta hali sa bakasyon kan mga trabajado sa tinampo ngonian na Pasko, an viajeng hali sa Manila pasiring sa Bicol si mga light vehicles dapat mag-agi sa Sipocot-Cabusao asin Libmanan mantang sa Andaya Highway si mga pampasajerong bus asin truck.

Si Clavecilla nagpaapod kasoodmang aga nin urulay sa mga opisyales kan DPWH Bicol, district engineers na nakakasakop kan premir asin segundo distrito kan Camarines Sur, alcalde sa mga banwaan kan Sipocot, Libmanan asin Cabusao, DILG, Philippine Army, Highway Patrol Group asin sa Capitolyo Provincial kan CamSur.

Sa lado kan DPWH Bicol, sinabi ni Construction Engr. Ella Arejola an proyecto piglalaoman na matapos sa huring semana kan Febrero 2020.

Si Provincial Director Col. Roderico Roy madestino nin kapupulisan na mamantenir kan bulos kan trafico, an law enforcer kan LTO magiging estricto sagcod na tiketan si mga pasaway na chofer na nagiging dahilan kan problema sa trafico.

An mga estratihiya kan task force na iimplementar pakatapos kan bagong taon iyo an pigpapanday sa ginigibong urulay kasoodmang hapon na pinangenotan ni Usec Clavecilla.

Saro sa naheling na problema sa trafico na pigrereclamo kan mga motorista asin natukar sa urulay kasoodma iyo an abalang patrabajo kan GCI Construction sa reblocking project.

An Project Engr. kan contratista na si Engr. Gina Mariñas naghagad man nin dispensa sa ginibong miting na pig-akseptar man tolos ni Clavecilla alagad nagpatanid na dapat dai na mautro. (DPAureus)