DPWH igwa nang kasurog sa congreso sa pagputol kahoy

January 3, 2020

Igwa nang kasurog an Department of Public Works and Highways (DPWH) kun maaprobaran an propuestong ley sa congreso na puede na sindang magputol nin mga puon nin kahoy dawa mayong pig-isyung tree cutting permit an Department of Environment and Natural Resources (DENR).


Dai pa sinabi kun anong House bill No. alagad si dating Metro Manila Development Authority asin ngonian Marikina City Congressman Bayani Fernando  iyo an padreno kan bill na pendiente na sa congreso, sabi ni Assistant District Engr. Richard Emmanuel Ragragio kan DPWH 3rd  Engineering District sa Baras, Canaman, Camarines Sur.


An propuestong ley dai man nagrarayo sa Acta Republika No. 11361, na mas midbid sa apod sa ‘’The Anti-Obstruction of Power Lines Act’’ na nag-aawtorisar sa mga cooperativa nin electricidad na magputol nin puon nin kahoy na nakakaulang sa mga poste asin linya nin kuryente dawa mayo nin permit hali sa DENR.


Nagtutubod an DPWH na napapanahon nang aprobaran an bill ni Fernando nganing dai makaulang sa mga proyecto sa infrastraktura na kabali sa mga Build-Build Build program ni Presidente Rodrigo Duterte.


Alagad an RA 11361 inaprobaran ni Duterte kan Agosto 8, 2019 asin hinahalat nalang kan mga cooperativa an ipapaluwas na implementing rule and regulations (IRR) nganing iimplementar ngonian na taon.


Welcome development man ini sa DPWH mientras na igwa pang pendienteng bill na magiging kasurog kan ahencia, sabi pa ni ADE Ragragio.


Nagkaperang mga road widening project kan 3rd Engineering District an dai matapos-tapos huli kan naging pagcontra kan grupo nin environmentalists sa Ciudad nin Naga na contrahon an pagputol nin mga kahoy.


An isyu nakaabot sa corte sas Ciudad nin Naga sagcod na nag-isyu nin temporary environmental protection order (TEPO) pabor sa petitions kan environmentalists alagad sa pinakahuring desisyon binawi na an TEPO matapos magkaigwa nin compromise agreement entre kan litigante asin dai palang nahahaloy inaprobaran kan corte.


Saro sa apektado kan TEPO iyo an road widening project sa barangay San Felipe na sagcod sa ngonian pendiente an pagtapos kan proyecto mantang dakul pang ulang na mga kahoy na yaon sa laog kan road right of way. (dpa) 

Share on Facebook
Share on Twitter
Please reload