Casong paghabon nin mga motorsiklo naglalangkaw

January 9, 2020

An Highway Patrol Group (HPG) sa Bicol nagpatanid sa mga kagsadiri nin motorsiklo na dai maging aliwalas sa paggaraje dawa saen na kanto mantang naglalangkaw an insidente nin panghahabon kan single motorcycle na haros cada semana igwa na pigsosombong sa mga jepatura de pulicia.


Saro sa dahilan iyo an kapabayaan kan kagsadiri mala ngani an iba pinapaagahan sana sa gilid kan tinampo na pigtatandaan sana kan parahabon pagnakabuelo dagos nang dinudolag.


Si P/Col. Cerilo Trilles, direktor rehiyonal kan HPG sa Bicol nagpaluwas nin aviso sa mga may kagsadiri nin motorsiklo na dapat dai maging pabaya sa saindang sasakyan nganing dai mabiktima.


An mga hinabunan na motorsiklo  an   iba    kinakalas asin pigpipinturahan nin bago sagcod na pinapabakal sa baratong presyo.


Dapat an nagbabakal magduda na kun barato an presyo asin hanapon an dokumentos nganing dai sinda makadamay sa caso, sabi pa ni Trilles.


Nganing makatabang sinda sa awtoridad isombong tolos sa pinakaharaning Police Station.


Sa casong carnaping nagbaba kan nagtalikod na premir hasta huring cuarto.


An HPG nakatutok sa anti-carnaping operations asin sa trafico sa mga national highway.


Sa ngonian katuwang sinda kan Philippine National Police asin Land Transportation Office sa pagmantenir kan gurubot na bulos kan trafico sa Andaya Highway mientras na nagpapadagos an reblocking project kan Department of Public Works and Highways.

Share on Facebook
Share on Twitter
Please reload