RevGov o CHA- CHA?

January 9, 2020

 

Bako lang si Presidente Duterte saka si Vice-Presidente Leni Robredo an may natatada pa nin sobra sa duwang taon sa saindang pwesto. Maski an mga opisyales sa gobyerno lokal poon gobernador, alkalde, punong barangay (extended pa ngani sagkod 2022), pati an mga congressmen sa manlaen-laen na distrito sa enterong Pilipinas asin doseng senadores kan  Republika.


Taon 2020 na, kun marhay an vista, ano an dapat nang guiribohon ngonyan kan satuyang mga lideres asin opisyales sa atubang kan grabeng problema kan kinaban, an naglalangkaw na presyo kan mga produktong petrolyo huli kan iriwal kan Amerika asin Iran, an global warming asin iba pang problema sa kapalibutan, an manlaen-laen na kalamidad na nag-aagui sato arog kan linog bagyo asin kasulo? 


Asin an pinakadakulang problema iyo an possibilidad na magka-igwa nin giyera mundial numeo 3.


Mientras tanto, ngonyan pa sana sige na an rilibot kan mga politiko sa mga baro-barangay, sige na an pana-o nin bagas, noodles asin de lata preparasyon sa eleksyon sa 2022. May mga nagdidiriskurso na ala miting de avance huli sa kadakul-dakol na tao na naghahalat nin relief goods. 


Sabi kan sarong bokal na naka-ulay ko kasubago, totoong nagpoproon na talaga an kampanya ngonyan pa sana. Pati an fund raising o paglikom nin pondong paragastos.


Sabi kan sarong peryodista na naka-ulay ko, may saro daang kontratista an nagtuga sa saiya na may dakulang  politiko  sa provincia an naghahagad saiya nin advance na 25 porsiento sa bilyones na kantidad na proyekto na bako pa man eksistido ta mayo pa man fundo. Kaya dae pa man siya nagtao. Anggot an dakulang politiko.


Dapat kaya sa lindong kan gobyerno ni Presidente Duterte bagohon na an direksyon kan politika kan mga TRAPO (traditional politician).


Arog kan paglinig kan ciudad nin Manila, kabesera kan Pilipinas, na ginigibo ni Yor me Isko Moreno, an paglinig kan Manila Bay, isla nin Boracay asin mga Isla sa Palawan susog sa orden ni Presidente Digong na panu-pano nin political will.


Arog kan lagduan na giyera kontra droga asin korapsyon na ipinipirit ni Duterte apesar kan pagkontra kan oposisyon arog kan Liberal Party, Dilawan asin ibang elementos kan Simbahan.


Enot, kun ano an ipinanuga kan naka-aguing karampanyahan dapat utubon.


Sa parte man kan publiko o kan elektorado dapat sigatohon an mga nanunungdan. Pagiromdomon. Tikwilon. Pokpokon an angog kun kinakaipuhan.


An media, an mga broadcasters, announcers, peryodista asin komentarista tuyawon si dapat tuyawon, omawon si dapat omawon, pagiromdomon kan saindang obligasyon. Maski pa an mga politiko na may sadiring estasyon asin telebisyon.


Dai kita matakot. Dai kita mahadit. Pirmi kitang makulit  sagkod sa aldaw nin pirilian. 


Tama; an kwarta sa bulsa,  ta an kwartang ibinabakal nin boto  bako man ninda.


Garo an vote buying o an pagbakal o an pagpabakal nin boto sa Pilipnas normal asin natural na, dai na mapupondo. 


Sa parte kan administrasyon ni Duterte kun mabago magbago na kan pasistema kan nasyon, bagohon na ninda an Constitusyon kun kaya total kontrolado ninda an Kongreso, asin an Camara Baja.


 Kun ma RevGov mag RevGov na kun kaya arog kan ginibo ni Cory. 

   
An pagbabago kan presenteng pasistema dapat ngonyan na.


Kun bako ngunyan nuarin pa?


Kun bakong si Digong, si Leni, kaya na daw?

Share on Facebook
Share on Twitter
Please reload