Road clearing operations bakong ningas kugon, sabi kan DILG

January 9, 2020

Ciudad nin Legazpi – An Department of Interior and Local Government (DILG) sa Bicol nag-aviso sa mga lokal na gobierno na ipapadagos  ngonian na 2020 kan saindang ahencia an pagpasunod sa directiva sa road clearing operation .


Si regional director Anthony Nuyda nagpahayag na dai magiging ningas kugon an directiva kan saindang opisina central asin matalaan liwat nin ika-duwang validation na posibleng punan sa laog kan bulan nin Febrero 2020.


Alagad mas lalong papahiwason base sa orden kan saindang central office kabali na an mga barangay road.
Ini nganing maseguro na mamantenir an kalinigan kan tinampo na magkaharali an mga illegal obstructions bako lang sa centro Poblacion.


Sinabi pa ni Nuyda an saindang mga validation team mabuelta sa mga tinampo kasunod kan mga sombong na nagbabaralikan naman si dating mga ilegal na obstruksyon.


Nganing masustenir an directiva kaipuhan ipadagos para sa disciplina kan comunidad, sabi pa kan DILG Bicol. 


Pigpunan kan nagtalikod na taon igwa nang alcalde sa Camarines Sur an  sinangatan nin caso administrativo sa Ombudsman ni DILG Secretary Eduardo Año matapos magbagsak sa grado sa directiva na ipahali an mga illegal obstructions sa tinampo.


Pigpaliwanag ni Nuyda na sampolo gabos na mga jefe ejecutivo sa Bicol an pigpadarahan nin show cause order  nganing magpaliwanag sa non-compliance  sa directiva kan  DILG alagad  si Alcalde Tomas Bongalonta Jr. kan Pili, Camarines Sur iyo sana an kinasohan huli kan posibleng dai ‘na-satisfy’’ an Assessment Team sa opisina central kaya nagdesisyon si Secretary Año na sangatan siya nin casong gross neglect of duty and grave misconduct.


Sa Camarines Sur kabali sa  hababa an grado iyo an banwaan nin Gainza na pinakasadit na banwaan alagad kuntento an ahencia sa paliwanag.


An iba pang mga lugar alagad dai na pigngaranan na mga banwaan, tolo sa Camarines Norte, tolo sa Masbate asin saro sa Sorsogon alagad dai na nakaayon sa mga kinasohan sa Ombudsman.


Sampolo gabos na mga alcalde an nag-aatubang nin caso sa Ombudsman na kinababalihan mga jefe ejecutivo sa Baco, Oriental Mindoro; Ginatilan, Cebu; Pagsanghan, Samar; Aurora asin Lapuyan, Zamboanga Del Sur; Sagay asin Guinsiliban, Camuigin; Maticao, Misamis Oriental; asin Caraga, Davao Oriental.


Sinda asin alcalde kan Pili, CSur tinawan nin panahon na magsunod sa directiva nganing mabawi kan gobierno an mga tinampo na ginagamit pampribado alagad dai nagsunod, sabi pa kan DILG.


An DILG nagpaluwas nin Memorandum Circular 2019-121 ‘directing LCEs to  use all their powers under the law to reclaim public roads being used for private ends’’.


Si Interior Undersecretary Jonathan Malaya, nagpahayag na an saindang ahencia magpaluwas nin directiva para sa panibagong 75 diyas na road-clearing operation.


Nakaabot man sa ahencia an mga report na nagbubuelta naman an mga ilegal na obstruksyon sagcod napapabayaan kan ibang mga jefe ejecutivo.    (dpa)

Share on Facebook
Share on Twitter
Please reload