TOWING ORDINANCE: Hurot suspendiron - MNCCI

January 9, 2020

Sa walang retrato asin sa tahaw mga enot na nagbalga kan towing ordinance kan City Hall ginagamitan nin panghatak nin vehiculo kan towing company nganing maseguro na mayong daños pasakat sa towing truck sagcod sa impounding area. Sa toong retrato padagos an mga pag-wheel clamp kan PSO sa pasaway na mga tsuper na dai nagsusunod sa ordinansa kan ciudad. (PSO)

 

 

Huhuroton kan Metro Naga Chamber of Commerce and Industry (MNCCI) sa lokal na gobierno kan Ciudad nin Naga na suspendiron muna an towing ordinance (TO) nin huli ta luway-luway nang na-aapektaran an mga establisimiento de negosyo mientras na napuon pa sana an implementasyon kan ordinansa.

 

Si Ferdinand Sia, Presidente kan MNCCI nagpahayag sa entrevista kan Bicol Mail sa paagi nin telepono an saindang sektor haloy nang nagsusuporta sa arin man na mga proyecto kan ciudad alagad kaipuhan man mabalanse sa ngaran na negosyo.


Napuon pa sana an implementasyon kan TO alagad dakul na an nagrereclamo mantang na-aapektaran man an saindang mga establisimiento lalo na kun si atubangan ninda sakop kan tow away zone.


Hahagadon ninda  mientras na suspendido an TO na adalan muna asin magbilog nin sarong technical committee kaiba an saindang sektor nganing ilaog man an saindang recomendasyon dawa na ngani dai man sinda totalmenteng nagcocontra sa ordinansa.


Grabe na an trafico sa ciudad asin saiyang pigbiklad an saindang nagkaperang mga suhestiyon na kinababalihan kan 1. maghanap nin mga parking area;  2. estrictong iimplementar kan mga awtoridad an traffic ordinance mientras na dakul na mga tsuper an dai nagsisinutil sa No loading/unloading area; 3. Magbugtak nin cover path walk nganing igwang lakawan an mga tawo; asin 4. Dapat magkaigwa nin advocacia na maglakaw nalang envez na maggamit pa nin vehiculo.


An planong magbugtak nin edificio bilang parking area gibohon muna antes kan towing ordinance, sabi pa kan MNCCI.


Saiyang pig-ehemplo kun an sarong parokyano nin hardware kulang an quince minutos sa pagkarga kan saiyang mga binabakal an mangyayari mahali o kun dai mapahatak na sana kan saindang vehiculo?


Pinahiwas pa an wheel clamp area yaon pa an towing ordinance kulang man an mga lugar nin parking area.
Si Consejal Joselito del Rosario, chairman kan Committee on Transport sa Sangguniang Panlungsod nagpahayag na andam nindang adalan ano man na rekomendasyon kan MNCCI.


An Towing and Expanded Wheel Clamp Ordinance o City Ordinance No. 2018-18 na-aprobaran kan 2018 asin nagsikad an implementasyon kan Enero 6, 2020.


Si Renne Gumba, jefe kan Public Safety Office kan City Hall iyo an natukahan ni Alcalde Nelson Legacion na punan na an implementasyon kan TO sa tahaw kan ‘’alarming’’ na an problema sa trafico.


Sinabi man ni Gumba na dagos-dagos an saindang implementasyon sagcod na mayo nin ano man na direktiva na sinususpendi an ordinansa. (DPA)

Share on Facebook
Share on Twitter
Please reload