HULI SA POLITICA: OIC kan BMC mademiter na

January 17, 2020

Nag-oobserbar si Tommy Lee (sa too) kan Presidential Anti-Corruption Commission (PACC) sa Bicol kun tama sa specifications an pig-eentrega kan supplier nin mga medical equipment kan Bicol Medical Center. (dpa)

 

Pig-aandaman na kan nagtutukaw na OIC Medical Director kan Bicol Medical Center (BMC) sa Ciudad nin Naga na magdemiter sa posisyon huli sa isyu sa ‘’pressure’’ sa saiya kan ibang mga politico sa Camarines Sur alagad dai naman pigngaranan asin dai na pigdetalye.

 

Alagad nakikiulay an Presidential Anti-Corruption Commission na dai muna maghali sa puesto.

 

Si Dr. Francisco Sales III nagpahayag sa exclusivong entrevista kan Bicol Mail na mas kumportable sa saiya an pagiging private practitioner bilang  sarong surgeon, ‘gusto ko na mag-operar dakul an natatabangan ko’.

 

Kan hapoton kan BM kun perang por ciento an posibilidad kan saiyang plano, sinabi kaini ’90 por ciento’.

 

Si Tommy Lee, regional coordinator kan Presidential Anti-Corruption Commission (PACC) na presente kan kinukunan nin entrevista  kan BM nadangog an planong pagdemiter ni Sales asin pigpakiulayan ‘nakikimaherak kami doc na ipadagos mo an marhay na serbisyo sa hospital’

 

Alagad an saiyang reaksyon, madali na siyang magretiro sa serbisyo. ‘Nagtatabang paman kita mas magayon mas presco o joven pang doctor an magkapot kaini, nagibo ko na si sugo samo na maging operasyonal an apat na bagong edificio asin nabukasan na para sa mga pasyente kan Deciembre 16, 2019’

 

Sa isyu sa pressure kan mga dai pigngaranan na mga politico, sinabi pa na dai mahahali sa buhay sa Filipino an politica.

 

Sinda nagtatabang naghahanap para sa budget kan hospital ‘’kun minsan dai mahali an pressure sako’’ Nin huli kaini, sinabi pa na nagpaparalangkaw an saiyang blood pressure si dating ‘120 over 80’’ alagad ngonian nagsakat na sa ‘160 over 90’.

 

Gusto ko magretiro na an BP magbuelta sa normal na ‘’120 over 80’ alagad an simbag man kan opisyal kan PACC , ako ngani an BP nagsasakat na sa ‘’180 over 140’, ipadagos mo an serbisyo.

 

Saiya pang sinabi, na si katuyohan kan pag-ako niya kan posisyon kan sinda mag-aratubang sa Malacanan huli kan mga enot na controvercia sa hospital, tabangan an kamawotan ni Presidential Adviser for Bicol Affairs Marvel Clavecilla asin ni PACC  Chairman Dante Jimenez na mabukasan muna an apat na bagong mga edificio.

 

Alagad ini narealisar na mala ngani operational na an apat na edificio tapos si pigtaong trabajo ‘gusto ko nang mag-relax matabangan nalang ko mas kumportable sako an pagtabang sa mga pasyente ta surgeon ako’. (DPAureus)

Share on Facebook
Share on Twitter
Please reload