Tricyle bawal sa nat’l road alagad tinutugotan kan LGU

January 17, 2020

Ciudad nin Legazpi –  Apesar kan prohibido sa mga national road an operasyon kan tricycle alagad an mga lokal na gobierno nag-iisyu nin mga franquicia na an saindang ruta puedeng magkayod sa national road.


Si Director Noreen Lutey kan Land Transportation Office (LTO) nagbuyagyag sa entrevista kan Bicol Mail na dakul nang mga insidente na an saindang traffic enforcer maging an saindang deputized na personajes kan PNP nagdadakop nin mga tricycle sa national road alagad dai matiketan o ma-isyuhan nin TOPs huli ta an saindang ruta yaon pa sa laog kan franquicia asin consideradong daing pagbalga sa trafico.

 

Sa report kan Bicol PNP, dakul na mga aksidente sa trafico sa national road huli sa  nagdadalagan na tricycle.

 

An solusyon digdi, segun ki director Lutey dapat enmiendahan kan lokal na gobierno an saindang ordinansa sa pag-isyu nin franquicia  asin dapat dai na ibali sa ruta kan mga nagkakayod na tricycle an national road nganing maiwasan an mga aksidente.

 

Igwa nang osip hali sa PNP na may LGU nag-iisyu nin franquicia sa operasyon kan mga tricycle sa saindang banwaan na tinutogotan sagcod sa siyam an pasajeros asin ini delicado sa mga aksidente.

 

Mandato sa LTO iyo an pag-implementar kan Acta Republika 4136 na kun igwang mga nagsisinutil sa tinampo puedeng dakopan an pasaway na tsuper asin isyuhan nin TOPs.

 

Afuera pa kaini kabali sa nag-eenforsar iyo an destinong  LTO deputized na  miembros  kan Philippine National Police na puedeng magamit kan mga alcalde.

 

An rehistrasyon kan tricycle yaon sa poder kan LTO alagad an pag-isyu nin franquicia yaon sa LGUs. (dpa) 

Share on Facebook
Share on Twitter
Please reload