Pagbawal kan tricycle sa nat’l road kayang ipasunod, sabi

An Mayors League of the Philippines (MLP), Camarines Sur Chapter nagcierto na kaya nindang iimplementar an Memorandum Circular 2007-01 kan Department of Interior and Local Government (DILG) nganing estricto nang ipagbawal sa national road an operasyon kan mga tricycle.

Si Alcalde Fermin Mabulo kan San Fernando, Camarines Sur asin Presidente kan MLP nagpahayag sa Bicol Mail na kayang-kaya ninda iimplementar an memorandum circular kan DILG alagad kun an ibang LGU igwang ordinansa na an franquicia nag-aagi sa national road puede ining resolber.

An pahayag na ini kan pamayo kan Liga kasunod kan pinaluwas na directiva ni Regional Director Brig. General Anthony Alcañeses kan Bicol PNP na nagsusugo sa mga jefe de pulicia na magcoordinar sa alcalde na dapat estricto nang iimplementar ninda an MC 2007-01.

Kabali sa binabawalan iyo an pedicab asin iba pang three wheels vehicle, dai na sinda tutugotan sa national road nganing dai pa makaulang sa trafico asin pabuelohan an mga four wheels vehicle.

Katuyohan kan PNP para sa safety kan tsuper asin pasajeros nin huli ta dakul nang mga aksidente sa trafico sa mga highway na envuelto an tricycle.

Sinabi ni Alcañeses an MC hali sa saindang directorate for operation kan Camp Crame na nagdidirehir sa mga jefe de pulicia na magcoordinar sa saindang alcalde nganing iimplementar na an memorandum kabali na an pagdakop sa mga overloading na pampasajerong tricycle asin jeepney.

Pig-ehemplo kan Bicol PNP si nangyaring aksidente sa national road sa Pamplona, Camarines Sur kan biglang mag-u turned an tricycle sagcod nang nabudalan nin pampasajerong bus asin walo an binawian nin buhay.

Tanganing malikayan an mga nagagadan sa trafico sa tinampo dapat ibawal na an mga tricycle sa mga national highway, sabi pa kan Bicol PNP. (dpa)