SA REBLOCKING PROJECT: Patrabajo sa Beguito Viejo tataposon na alagad sa Andaya Highway ‘forever’

Si Presidential Adviser for Bicol Affairs Marvel Clavecilla (sa too) pigdadangog an asegurasyon ni Engr. Ehla Arejola (sa wala), jefe kan Construction Division kan opisina rehiyohal kan DPWH na matatapos sa Marso 2020 an naabalang patrabajo kan reblocking project sa Beguito Viejo, Libmanan, Camarines Sur. (dpa)

Nagcierto an Department of Public Works and Highways (DPWH) sa Bicol na matatapos an reblocking project sa barangay Beguito Viejo, Libmanan, Camarines Sur sakop kan Maharlika Highway sa laog kan bulan nin Marso 2020 alagad an kaparejong proyecto sa mga banwaan na sakop kan Andaya Highway mayong pigtalaan na panahon.

Si Engr. Ehla Arejola, jefe kan Construction Division kan DPWH Bicol nagpangako kaini sa atubangan ni Presidential Adviser for Bicol Affairs Marvel Clavecilla sa ginibong urulay kan Traffic Management Task Force sa problema sa trafico sa Maharlika Highway asin Andaya Highway.

Alagad kun mayong pigtalaan kun nuarin an target completion sa mga reblocking project sa Andaya Highway, an dahil nagkaperang mga contratista an nag-iimplementar kan proyecto.

Si Usec Clavecilla nagpaapod nin miting kan Viernes na hapon, Enero 10, 2020 na ginibo sa Avenue Hotel nganing urulayan an mga preparasyon kun liwat naman mangyari an problema sa bulos kan trafico sa Maharlika asin Andaya Highway.

Pigpaliwanag ni Arejola na gigibohon nang 14 days an curing period sa proyecto sa Beguito Viejo asin dai kakayahon an 3 days curing period huli kan kamahalaan kan chemical na pighahalo sa pagsemento na iyo an reclamo kan GCI Construction and Supply na iyo an nakacontrata kan proyecto.

An reblocking project sa Andaya Highway saro sa Build-Build-Build program ni Presidente Rodrigo asin magpapadagos ini sa mga banwaan kan Sipocot, Lupi asin sundo pa sa linderos kan Camarines Sur asin Camarines Norte mantang igwa man sa provincia nin Quezon.

Sa ginibong urulay kan task force magtatarabangan an LGUs kan Libmanan, Sipocot asin Cabusao; PNP, Philippine Army, LTO, Highway Patrol asin DPWH na presente sa pinaapod na urulay ni Usec Clavecilla. (dpa)