ATLAS

Atlas, paka-agui nin halawig na panahon an amigo kong nagpapasan kan gabos na problema kan kinaban 75 anyos na, garo diamante na an kintab asin tagas kan saiyang pagkabuhay.

Ngonyan wheelchair na an nagkakarga saiya haling Bagacay, Tinambac pasiring sa Naga, Clupa, Mayon asin Villa Corazon. Gusto pang mag wheelchair pasiring Canada sa likod an saiyang pinakamamahal na si Lydia.

Namundag sa Tinambac, duman nagdakula, nag-eskwela sa Ateneo, nag collage sa Camarines Sur School of Arts & Trade(CSTS) sa Naga, nagduman sa Agrikultura (CSSAC/CBSUA) tanganing mag-adal pag-uma asin nag-eskwela sa UNC nin education kun saen siya nagsikat bilang editor-in-chief kan The Nueva Caceres an pinakadakulang school- based community publication sa Bicol kan dekada 60-70, may 5mil na circulation sa mga estudyantes kan UNC asin para sa publiko en heneral, libre mayong bayad.

Duman nabisto an saiyang abilidad magsurat sa tataramon na English, naguin inspirasyon siya kan mga estudyanteng mahilig man magsurat asin kan kadaklan kan mga chikas kan panahon.

Ateneo, sa trade school, sa agrikultura asin sa UNC bako lang parasurat, campus editor kundi student leader pa si Emiliano S. Saavedra Jr. aka “Duyong” sa saiyang pamilya.

Naguin cub reporter siya kan daan na Bikol Mail kairiba pa si Henry Briguera, depuntong Alex Abad asin ining alang-alang pa, maski aktibista dai siya nagbali sa militanteng Kabataang Makabayan (KM) pero nag-ayon siya sa CONDA or Conference of National Delegates Association, College Editor sa Guild of the Philippines (CEGP) asin Gamma Delta Epsilon sarong Greek-letter society sa UNC poon kadto sagkod ngonyan miyembro kan SDK o Samahang Double Knit si Emil, dai nagsusulot nin maong na pantalon o shorts pan o ining usong bara’bang pantalon kan mga bagong tubo asin senior citizens na nagyayaba-yaba sa SM.

Sa UNC campus bilang parasurat asin paramasid kan mga hiro-hiro nin tao duman na nagpoon an saiyang pagpasan kan mga problema kan kinaban maski problema kan gobyerno, problema kan UNC administration, problema kan Malacaṅang, problema kan NPA, problema kan alabado, problemang personal kan mga kababaihan saiyang pig-iisip kun ano an pinakamarhay para sainda.

Pigmukna niya an grupong Arana Boys na kumpwesto kan saiyang mga barkada na si Hsulan Primavera, Ompong Baldemor, Nick Marasigan, Jovito Palo, Pay Pael San Andres asin Edgar Tuy. Ako palan kabali man.

Pinadakula niya si Johnny Delos Santos, Gerry Claveria, Herculanos Sabas asin Luz Equipado bilang mga parasurat asin outstanding student leader. Dai siya nagbale sa mga student demonstrations o mass actions ta yaon siya sa gilid nagmamasid pigsusurat para sa mga peryodiko an mga aktibidades.

Kan makatapos nin kolehiyo, bilang idealist nagtukdo siya sa harayong banwaan kan Siruma imbes na sa Naga o sa Tinambac.

Gulpi siyang natukduan na mga kaakian sa magayonon na banwaan na bistado sa mineral na white clay asin kadakul na mga tourist spots. Kadto pati maagui ka pang dagat maka-abot lang sa banwaan kan Siruma.

Orgolyoso man siya kan turismo kan saiyang banwaan mala ta dinara niya an Arana Boys sa isla kan Kawit sa Tinambac asin iba pang magagayon na lugar kan saiyang banwaan.

Duman nagpoon an pag-ragod niya kaaalsa kan mga sakit nin tao. Pigsusurat niya sa saiyang mga editoryals asin columns sa mga diyaryong lokal arog kan Bicol Monitor asin Bicol Mail. Nagsurat sya nin libro dapit sa buhay kan saiyang idol na si Luis R. Villafuerte, pighahalat pang magluwas sa imprinta.

Nagproducer siya nin semanal na programa sa GMA 7 kan dekada 90 na an director sa Sammy Garcia na ako an anchor man.

Naguin OIC-Vice Mayor appointed kan Tinambac paka EDSA Revolution. Pag-eleksyon daog. Naguin PRO siya kan Bureau of Fishiries and Acquatic Resources, an pinakamaogma asin magayon niyang karera sa gobyerno sa lindong kan liderato kadto ni director Frank Pili. Naguin PRO man siya ni congressman Sal Fortuno kan Rinconada sa Batasang Pambansa.

Pigmukna niya an MassCom Arts and Affairs na nagproducer kan pelikulang “The Good and the Bad”, estorya kan mga gawi-gawi kan debotos ni Ina. 25 years in the making (hapota nindo si Al Ubaṅa saka si Maribel dela Rosa).

Gulpihon siyang advocasist sa laog kan saiyang isip arog kan pagsararo kan gabos na mga parasurat sa Bicol. Siya ngonyan an Ex-oficio chairman kan Kantong Putikon (Part II) sa SM City Naga. Kan mabagsik pa siya aro-aldaw siya sa SM nakikipaghuntahan sa mga taga-media, pensionado, retirees asin mga senior citizens ultimo niyang piglansar an saiyang Blue Revolution Movement sa laog kan SM ta gusto niyang magka-igwa nin gobyernong Parliamentaryo. Kontra siya sa Federalismo. Bangit siya kadto ki Jess Robredo, ki NoyNoy Aquino, lalo na ki Digong.

Pero ngonyan pig-oomaw niya si VP Leni na esposa kadtong depuntong JMR an ultimo niyang mayor na proyekto iyo an pag-areglo kan planong pagbanga kan provincia kan Camarines Sur ninda Fuentebella Dynasty vs Villafuerte Dynasty.

An magayon lang ki Emil asin maogma sa buhay ni Emil iyo an suportado siyang entero kan saiyang pamilya an agom niyang si Lyd, limang aki asin mga maku-apo.

An plano niya kadto na itaas an monumento ni Rizal sa plaza kan Naga nganing mgaka-igwa nin parking area sa irarom gulpi nang nagsusuportar ngonyan.

Iyan an vision and mission ni Emiliano San Andres Saavedra Jr. alyas Emiliano Zapata.