SA DEPED BICOL: Andam magrecibe kan manga estudianteng apektado kan Taal

January 23, 2020

An Departamento de Edukasyon (DepEd) Bicol nagpahayag na preparado sindang akoon an mga estudiantes na apektado  kan  saindang  pagklase  hali sa Batangas huli kan pag-alburoto kan Bulkan Taal. 


Si DepEd Regional Director Gilbert Sadsad  nagsabi  andam akoon kan mga public schools sa Bicol kun igwang mga transferees na estudiantes hali sa 14- kilometer danger zone dawa mayong credentials.


Sainda nang ginibo ini kan saindang buksan an Bicol sa escuelas publika digdi sa mga estudiantes na na-apektuhan kan nangyaring kariribokan sa Ciudad nin Marawi kan nagtalikod na taon.


Dawa mayo pang kasugoan an DepEd, dati na ining pinapasunod kan ahencia bilang saindang standard procedure na akoon an mga estudiantes na biktima kan calamidad dawa mayo pa an credentials.


Si DepEd Secretary Leonor Briones igwa nang Memorandum Circular No. 3 serye kan 2020 na an gabos na mga escuelas publica sa laog kan Calabarzon pigsusugo na i-akumodar an mga apektadong nag-aaradal dawa kulang an saindang transfer credentials.


Dinagdag pa kan ahencia mayo naman nin problema mantang sarong curriculum an saindang pig-uusar kan mga escuelahan bako lang digdi sa rehiyon Bicol envez maging sa bilog na nasyon.


An programang ini kan DepEd nganing dai maapektaran an mga estudiante asin magpadagos kan saindang edukasyon.


Ocupado an maabot sa 1,600 na classrooms sa 141 mga public schools kan labi sa 58,000 evacuees sa Batangas.


Sagcod sa ngonian nakabandera pa sa Alert level  4  an  Bulkan Taal, base sa report kan Phivolcs asin padagos pang suspendido an klase sa mga pribado asin man pampublikong escuelahan.

Share on Facebook
Share on Twitter
Please reload