CD Servita ginisa kan SP sa isyu sa jueteng

Dai maipaliwanag ni City Director Col. Felix Servita kan Naga City Police Office (NCPO) sa mga miembros kan Sanggunian Panlungsod kun tano ta dai napapapundo an operasyon kan ilegal na jueteng sa saiyang area of responsibility.

Langtadan na an tarayaan dai pa naaaraman alagad an Philippine Charity Sweeptakes Office (PCSO) sa Camarines Sur sa pamamayo ni Jobet Ramos nag-aaram kan ilegal na sugal.

An NCPO igwang alokasyon sa intelligence fund mas marhay pa an PCSO detalyado an report asin mga listahan kan mga nagluluwas na numero sa tolong veces na gugo kan jueteng aroaldaw?, saro ini sa mga kahapotan ni Consejal Mila Raquid-Arroyo sa City Director.

An simbag kan CD igwa naman sindang nadakop asin kinasohan, kun igwang nagsusombong sa NCPO kaipuhan pa an maninigong ‘validation’.

Bako man sa Ciudad nin Naga an operasyon envez nagcocolecta sana an mga correador asin an bola sa luwas kan ciudad, sabi pa sa paliwanag ni Servita.

Si Consejal Vidal Castillo nagbuyagyag man na nakakadamay sa isyu sa jueteng iyo si Bise Presidente Leni Robredo mala ngani nagluwas pa sa sarong artikulo sa tabloid sa nasyonal na may titulong ‘Jueteng sa hometown ni Leni umarangkada na’.

Sinabi ni Castillo na aram niya na may motibo political an sinambit na artikulo kaya pigdadamay an Bise Presidente, an solusyon digdi ipapundo kan NCPO an ilegal na sugal.

Nagtindog man si Consejal Greg Abonal asin an saiyang kahapotan dakul nganing nadadakop na mga envuelto sa droga na sekreto an transaksyon alagad an jueteng na langtadang an tarayaan dai naheheling kan NCPO.

Sinabi pa kan CD na igwa na siyang direktiva sa mga Police Sub Station na darakopon an mga nagpapatarayang correador.