DAWA MAY BAGONG MGA EDIFICIO: Pasyente sa BMC, suruksokan, sabi

January 30, 2020

Nabuksan na an apat na bagong mga edificio kan Bicol Medical Center (BMC), suroksokan man giraray an mga pasyente alagad an solusyon digdi kun punan na an pagpadalagan kan Universal Health Care (UHC) mababawasan na digdi an mga pasyente mantang mas mapapakarhay an puerperal service sa mga district hospital.


Maabot sana sa 500 an bed capacity kan BMC alagad suroksokan an mga pasytente mala ngani aroaldaw nag-aabot na sa  1,200.


Ini an mga pahayag sa Bicol  Mail  ni OIC Medical Director Dr. Francisco Sales III matapos buksan  na kan Deciembre 16, 2019  an apat na mga edificio dawa na ngani an 8th storey sagcod pa sana an 4th storey an nagagamit mientras na nagpapadagos patrabajo sa ibang storey kan pinakadakulang edificio kan hospital.
An Acta Republica No. 11223  (UHC) inaprobaran ni Presidente Duterte kan Febrero 20, 2019 asin piglalaoman na iimplementar ngonian na taon dakulang bagay nganing ma-decongest an padagos na nagsusuroksokan na pasyente sa BMC.


An UHC, iyo an health care system na gabos na mga residentes sa nasyon o rehiyon nakakaseguro kan programa kan gobierno sa health care.


An manijamiento kan BMC dai puedeng  mag-sadiring magdugang nin bed capacity huli ta nagdedefende sinda sa budget allocation. Kun igwang dugang na bed capacity kaipuhan man an dugang na nurses, doctor asin empleados.


Aprobado na sa 3rd and final reading kan 18th Congress an house bill  No. 883 ni CamSur 3rd district Congressman Gabby Bordado para sa dugang na bed capacity hali sa dating 500 gigibohon nang 1,000  asin upgrading kan mga service facilities, dugang medical equipments, doctor, nurses asin empleadps kan BMC alagad maagi pa ini sa proceso sagcod na aprobaran sa senado, sabi pa ni Sales.


Sinabi ni Bordado sinda senador Bong Go, Kiko Pangilinan asin Risa Hontiveros iyo man an saiyang counterpart sa senado na mapadreno kan saiyang bill asin nagtutubod siya na maaprobaran man giraray nganing maging ley.


Sa kaparejong entrevista ki OIC medical director, katuyohan kan saindang pagbalyo sa bagong 8th storey bulding huli ta grabe na an nagsusuroksokan na pasyente sa lomang edificio.


Igwa na digdi nin emergency room para sa surgery case.          (dpa)
 

Share on Facebook
Share on Twitter
Please reload