LGUs na bagsak grado sa road clearing makakabawi

January 30, 2020

Ciudad nin Legazpi – An mga lokal na gobierno tinatawan pa nin pagkakataon kan Department of Interior and Local Government (DILG) na puede pang makabawi sa 2nd batch sa road clearing operations na posibleng ipadagos kan ahencia sa Marso 2020.


Si DILG Regional Director Anthony Nuyda nagpahayag na igwa nang memorandum circular an saindang opisina central nganing ipadagos liwat an pag-inspeksyon kan saindang validation team.


Alagad saiyang sinabi na bako nalang sa mga centro de negosyo kan ciudad o banwaan envez kabali na an mga barangay na napapabayaan okupado na an tinampo kan pribadong indibidual.


An DILG nagtalaan nin 60 diyas na parameter sa LGUs nganing mahali an mga ulang na estractura sa mga public roads asin sidewalks na ginagamit na para sa pribadong katuyohan.


Sa Camarines Sur an unikong nagbagsak si grado iyo an LGU sa Pili, Camarines Sur sa pamamayo ni Alcalde Tomas Bongalonta asin an banwaan na ini na iyo pa an kabisera kan provincia.


Alagad an jefe ejecutivo sa mga pahayag kaini sa media nagtutubod siya na igwang nasa likod na politico sa Camarines Sur nganing sangatan siya nin caso sa Ombudsman.


Si Alcalde Bongalonta nagpahayag na saiya nang pinaharali ngonian si mga ‘’off road parking lots’’ asin nang estrictong pig-iimplementar an designadong parking lots sa pribado asin sa pampasajerong vehiculos.
Afuera pa kaini, si mga paratienda binugtak na sa tamang lugar na dai makaka-apektar sa trafico.


An jefe ejecutivo nagcierto na saiyang susunodon an direktiva ni Presidente Rodrigo Duterte sa suporta sa ordinansa kan Sanggunian Bayan.   (dpa)

Share on Facebook
Share on Twitter
Please reload