Sektor nin transporte baranga sa jeepney modernization program

February 6, 2020

Apesar kan mga pagcontra kan sektor nin transporte sa Transport Modernization Program kan administrasyon ni Presidente Duterte alagad an Cooperative Development Authority (CDA) nagpahayag na naglalaba na an listahan kan mga organisasyon nin pampasajerong jeepney sa Bicol nganing magparehistro bilang stock cooperative.


Alagad duda an mga nagcocontra kun kakayahon an milyon pesos na presyo kan modern jeep.


Sinabi ni Assistant Regional Director Grace Layosa kan CDA Bicol na antes inaaprobaran ninda an aplikasyon kan mga mapalista bilang  stock cooperative  dapat magagi muna sa free registration seminar sa saindang ahencia.


Kabali pa sa pigmamando kan ley dapat magtapos muna sa cooperative education on transport seminar sa Office of the Transport Cooperative sa lindong kan Department of Transportation  (DOTr) sa Ciudad nin Legazpi asin sa Flaet Management Seminar sa Land Transportation Franchising and Regulatory Board (LTFRB).


Sa listahan na nakua kan Bicol Mail ki Rodrigo Fajardo, section chief registration kan CDA Bicol nagkapera nang organisasyon nin mga operator/driver nin jeepney an aprobado bilang tunay na cooperativa hali sa nagkaperang provincia kan Bicol asin ini kinababalihan kan Goa-Tigaon Transport Cooperative sa Partido district; Barcelonita-Gubat Sorsogon Transport Cooperative; Barcelona-Juban Transport Cooperative sa Sorsogon; Bulan Transport Cooperative sa Sorsogon; Naga-Ragay Transport Cooperative sa Camarines Sur; Centro-Panganiban-Del Rosario Transport Cooperative sa Ciudad nin Naga; Naga-Pasacao Transport Cooperative; Gubat Transport Cooperative; Naga-San Fernando Transport Cooperative, Jeepney Transport of Pasacao, Naga-Siruma Transport Service Coop gabos digdi sa Camarines Sur.


Afuera pa kaini, igwa pang pendienteng aplikante iyo an Gainza Jeepney Transport Cooperative.


Sinabi ni Fajardo katuyohan kan organisasyon nin jeepney na magparehistro sa CDA nin huli ta interesado na magbakal nin modern jeep na saro sa pigmamando kan LTFRB na kun mabakal o mautang para sa modernong pampasajerong jeepney dapat rehistrado bilang stock cooperative sa CDA.


Sinabi kan LTFRB Bicol na mahiwas an modern jeep igwang 33 na tukawan asin dai na magastos sa crudo envez solar power.
 

MODERNIZATION KAN JEEPNEY PIGCO-CONTRA KAN CONDOR-PISTON

 

Si Joel Pillogo, lider kan Condor-Piston sa Bicol nagpahayag na mantenido an saindang panindugan contra sa jeepney modernization program huli ta an makikinabang kaini si mga dati nang milyonaryong kapitalista.


Nagtutubod sinda pag-phase out an ginigibo kan gobierno sa mga jeepney asin riribayan kan P2.5 milyon na modernong jeep asin si mga loma dai na ikakayod envez pampribado na sana.


Inapod kan Condor-Piston na fekeng modernization nin huli ta an ginigibo ngonian kan gobierno luway-luway na ginagadan an saindang pagbuhay mantang dai kakayahon kan mga operator an halangkaw na presyo kan E-Jeep.

 

Saro man na rehistradong cooperative an disganado man sa programa kan gobierno huli ta magabat an presyo asin dai ninda kakayahon.


Sinabi ni Roberto Darilay, pamayo kan Piston Development Cooperative sa Ciudad nin Naga dai ninda kaya an presyo dawa pa hulogan an pagbayad. (dpa)           

Share on Facebook
Share on Twitter
Please reload