NAGA SARONG BANGGI @ 50 Sa Pagkasararo May Kusog (SPMK)

Enot na nagka-igwa nin sanga an Sarong Banggi na sarong socio-cultural organization kan taon 1970.

Pitong juvenes na Bicolano na medyo may pagka-aktibista an nagkaburunyog tanganing buksan an SB chapter sa Bicol. Anom na taon pakatapos na mamundag sa Los Baños, Laguna naisipan ninda na magka-igwa nin mga bagong hermanos y hermanas tanganing maibalangibog an saindang battlecry/motto na: Sa Pagkasararo May Kusog.

Arog kan mother chapter an bagong an Naga Sarong Banggi may tuyo na: 1). Magkasararo an gabos na Bicolano saen man na parte kan kinaban. 2). Ipreservar asin ibalangibog an kultura asin linguaheng Bicolnon. 3). Manodan kan mga Bicolano lalo na kan mg juvenes an tunay na istorya kan ronang Kabicolan. An mga founders kan Naga Sarong Banggi iyo sinda: Domingo Boy Claro, Ernesto Verdadero, Antonio Martires, Dario Javier, Nelson Caceres, Gemino Pilapil, asin Jose Surtida Arroyo Jr(+).

An Naga Sarong Banggi compuesto nin duwang eskwelahan, an Ateneo de Naga asin University of Nueva Caceres. An primerong batch kan mga miyembros kan SB sa Naga pinili an cream of the crop kan duwang eskwelahan. Mala ta kadaklan sainda nag-asenso sa kanya-kanyang propesyon, naguin executives, nag-arabroad asin mga haralangkaw na opisyales kan gobyerno asin pribadong sektor.

Aktibo sinda sa sports arog kan basketball asin karate pero mga scholars asin haralangkaw an marka. Nagka-igwa nin ideya na buksan an Sarong Banggi sa Naga huli ta an Samahang Kamangyan na cultural stage artists kan Philippine College of Commerce (PCC), militanteng grupo hali sa Metro Manila dinara sa Naga kan presidente kan UPLB mother chapter kadto na si Perpecto Bragais Jr. asin nagkakanap na kadto an aktibismo haling Kamaynilaan, UP asin UPLB pasiring sa mga provincias.

Haling Naga nagburukas naman nin SB chapters sa Bicol University College of Agriculture (Guinobatan campus), Bicol University main campus-Legazpi, Bicol University Tabaco campus (College of Fisheries), Camarines Sur State Agricultural College (CCSAC/Central Bicol State University of Agriculture/ CBSUA), Camarines Norte State College, Daet Parochial School, asin iba pa sagkod Kamaynilaan o Metro Manila), BU Polangui.

Nag-abot an punto na an Sarong Banggi bilang socio-cultural organization iyo an naguin pinakadakula na grupo nin mga Bicolanong estudyante asin juven na propesyonal bako lang sa Bicol o Pilipinas kundi sa enterong kinaban.

Kan panahon na idto antes asin durante kan Martial Law dakul na mga estudyanteng Bicolano sa Manila asin sa UP an nagdurulag pasiring sa provincia. Kadaklan nagbali sa Sarong Banggi.

May mga miyembros na nagbali sa Kabataang Makabayan, Samahang Democratikong Pilipino, Lakas Diwa asin Khi Rho Movement kaya mismong mga miyembros baranga. An sarong grupo para sa rebolusyon, as saro para sa reporma, an saro mag-aradal sana daing paki-aram sa politika kan panahon.

May mga SB sa militar asin pulis, may mga SB na rebelde, may mga taga media, local asin nasyonal, may mga maestros y maestras, igwa man mga para-oma. May saro nganing heneral sa army, may training director kan PNP, igwa man mga kumander kan NPA. Mala ta kan dekada 80 blacklisted an SB, may dai nakakaruluwas sa Pilipinas asin nasakitan maghanap nin trabaho ta pigkukuli-kulian sinda kan ibang ahensiyas kan gobyerno asin pribado.

An Naga Sarong Banggi nabanga sa duwa: UNC saka Ateneo chapters. Kan dekada 70-80 namukna an Sarong Banggi national organization.

Enot na national chairman si Dario Javier, ika-duwa si Ernesto Verdadero kun sain labing 300 na delegados an nag-atendir na ginibo sa Social Hall kan Milaor ta an chairman vice-alkalde kaidto kan banwaan. Sa tiripon na idto naguin desisyon kan mayoriyang participantes sa national convention na ribayan an spelling kan pangran kan organisasyon hali sa Sarong Bangui pasiring sa Sarong Banggi asin nagka-igwa nin general amnesty o pagpatawad asin pagbalik guiraray sa general membership kan mga enot na na-expelled o napatalsik sa organisasyon arog kadto ki Doming Discaya, asin Jun Bragais.

Kan magkaigwa nin dakulang tiripon an SB sa City Hall sabi ni depuntong alkalde Jess Robredo “an Sarong Banggi iyo an pinakadakula asin pinakapamusong organisasyon kan mga Bicolano”. Nagproducer nin mga politiko, bankero, regional directors, asin popular na broadcasters asin taga diyaryo.

Kun minatiripon pati rinibo an naatinder poon Metro Manila, Universidad kan Pilipinas, haling abroad asin ibang parte kan mundo.

An mga naguin national chairmen kan SB apuera ki Javier asin Verdadero iyo sinda: Bob Geronimo(+), Rolando Mendonis, Ricardo San Andres, Brix Cledera, Attry. Gelacio ‘Bong’ Rivera Jr,(+) Jojo Villafuerte, Salvador ‘Boy’ Cruzana Jr., Danilo Guevara(+), Atty. Bok Vibal, Mar Verona, Art Villamor, Art Torres, Mani Yatco, asin ngonyan si Rhondon Ricafort.

Maski sa Sorsogon, Catanduanes, asin Masbate dakul an miyembros kan Sarong Banggi.

Labing 50ng taon na an naka-agui pero sagkod ngonyan an hapot iyo man guiraray: Ano sararo na an mga Bicolano, an anom na provincias asin pitong ciudades? Siisay an solong lider kan mga Bicolano? Makapa-presidente daw kan Pilipinas an Bicol?

Maaaraman an kasimbagan kan gabos na iyan sa ika-50ng aniversaryo kan Naga Sarong Banggi sa Febrero 28.

I Love sarong Banggi! Mabuhay an sarong Banggi!

SPMK!