3 sa 6 na provincia sa Bicol iyo sana an may franquicia sa STL

February 13, 2020

Tolo sanang provincia sa Bicol an nagpapadagos kan saindang operasyon sa Small Town Lottery (STL) na na-isyuhan nin franquicia kan Philippine Charity Sweeptakes Office (PCSO) alagad si ibang provincia kun may koleksyon posibleng prontera sana kan sugal na jueteng.


Si Jobet Ramos, provincial manager sa sanga kan PCSO sa Camarines Sur nagpahayag an mga provincia na igwang franquicia kan saindang opisina central iyo an Camarines Norte, Catanduanes asin Sorsogon na nakatalaan nang magpaso an saindang permit alagad kaipuhan sanang mag-renew.

 

An mga provincia kan Albay, Masbate asin Camarines Sur dai  pa naaprobaran an saindang franquicia asin napag-araman kan PCSO na kun igwang nangyayaring koleksyon iyan sa ilegal na sugal na jueteng bako sa STL.

 

Sa Camarines Sur an nagkaperang  kabo kan Evenchance Gaming Corporation na dating operator  kan STL digdi nag-inpormar na sa opisina ni Ramos na sa dai mahahaloy mapuon naman sinda sa koleksyon.

 

Alagad sinabi ni Ramos na sagcod sa ngonian mayo pa sindang kumfirmasyon sa main office sa Manila kun tinawan na nin franquicia an Evenchance mantang igwa  pa ining obligasyon na dapat mabayadan sa PCSO antes magbuelta sa saindang operasyon sa CamSur.

 

An PCSO sa Ciudad nin Naga iyo an nagbuyagyag sa Sangguniang Panlungsod na padagos an sugal na jueteng digdi alagad mayong ginigibong aksyon an Naga City Police Office.

 

Si Ramos pigpresentar na mga evidencia sa sesyon regular kan SP si mga numero na nagluluwas aroaldaw sa jueteng sa ciudad mantang mahiwas an kolesyon kan correador sa veinte sieteng barangay kan Naga.

 

Kan mag-atubang sa sesyon kan SP si City Director Col. Felix Servita Jr. sinabi kaini na igwa naman sindang nadakop na kolektor asin sinangatan na nin caso sa corte.

 

An gugo kan ilegal na sugal bako man sa area of responsibility kan NCPO alagad sa kataid na municipalidad kan ciudad, sabi pa ni Servita.

Share on Facebook
Share on Twitter
Please reload