BAYAN duda sa pagbasura ni Duterte sa VFA

February 13, 2020

Duda an progresibong grupo sa Camarines Sur sa naging desisyon ni Presidente Rodrigo Duterte na ibasura na an Visiting Force Agreement entre kan Filipinas asin Estados Unidos alagad katapos-tapose babawion man sana.

 

Ini an pagtubod ni Nelsy Rodriguez pamayo kan Bayan  Muna sa CamSur mantang midbid na kan namamanuan Filipino na ‘’laban-bawi’’ an mga binubutasan na pahayag kan Presidente.

 

An noticia pinadara na ni Department of Foreign Affairs Secretary Teddy Locsin sa Embajada kan Estados Unidos.

 

Saro sa saindang narisa na dai man epektivo tolos an notice of termination sa VFA na pigrecibe na kan Embajada kan U.S. envez igwa pang 180 diyas o anom na bulan puon na marecibe. Sa laog kan anom na bulan gulpi pa an puedeng mangyari huli ta igwa pang cuestion legal an desisyon ni Duterte.

 

Pinapaboran ninda an aksyon ni Duterte alagad an saindang panindugan na kun ibabasura an tratado para sa soberanya kan satong nasyon bako sana sa saiyang kaalyadong Senador Ronald ‘Bato’ Dela Rosa.

 

An pagbawi kan Estados Unidos sa VISA ni Dela Rosa bakong mayor na isyu huli ta personal ini kan senador.

 

An progresibong grupo haloy nang nagdedenuncia sa VFA nin huli kan mga nangyayari sa Filipinas kabali na an pang-aabuso sa mga kababaehan, pagbalga sa deretso humano asin iba pang mga pakikiaram sa satong nasyon.            (dpa)

Share on Facebook
Share on Twitter
Please reload