NAGVIAJE SA MACAU, CHINA: Opisyales kan LGU Magarao nakahawas na sa cuarentena

February 13, 2020

Nakaluwas na sa katorce diyas na self quarantine an mga opisyales lokal kan Magarao, Camarines Sur sa pamamayo ninda Alcalde Philip Salvador A. Señar asin Bise Alcalde Randy Villaralbo asin 19 pang opisyales lokal asin kaibanan na familia matapos kan saindang tolong aldaw na viaje sa Macau, China alagad gabos negativo sa ano man na  senyales asin sintomas sa pigtatakotan na 2019 novel coronavirus.

 

Kasoodmang Febrero 12 nakaluwas sinda sa  katorce diyas na home quarantine na na pigmamando kan memorandum circular (MC) kan Department of Health numerado 2020-0034 na Interim Guidelines kan ahencia.

 

Pinapaheling ni Alcalde Señar sa reporter kan Bicol Mail an kopya kan Medical Certificate na pig-isyu kan MHO asin DOH na tapos na sinda sa 14 days home quarantine period asin negativo sa ano man na senyales asin sintomas sa nCov.                                                                                                                (DPA)
 

 

Sa entrevista kan Bicol Mail ki Alcalde Señar  mantang naglaog na sa saiyang opisina kasoodma pinaheling kaini an kopya kan Medical Certificate na pirmado ni Arlene Austria, public nurse kan LGU asin kan DOH na nagkumple sinda sa pigmamando kan MC kan ahencia bilang pagpaseguro sa delicadong virus na naghali sa Wuhan City, China boot sabihon negativo sinda sa ano sintomas kan 2019 nCov.


Puon na mag-self quarantine sinda mayong pigkalintura asin pigsipon na nakua sa pagviaje asin huli kaini, buelta na sinda sa trabajo, sabi pa ni Señar.


Mandato kan Interim Guidelines na arin man na opisyales lokal na hali sa viaje sa mga nasyones na igwa nang nCov obligado sa home quarantine. 


Piglinaw ni Señar na sadiri nindang gastos an pagviaje bako hali sa fondo kan LGU mantang bulan pa nin Septiembre 2019 igwa na sindang mga ticket para sa saindang pagbakasyon na nagviaje puon kan Enero 26 sagcod nakabuelta sinda kan Enero 29.


Nagviaje sinda na mayo pang travel ban an gobierno alagad nagluwas an travel ban sa China kan Febrero 2.


Kabali sa kaibanan ninda iyo sinda Consejales Edmund Adren Billiones, Edmundo Bustamante, Santy Estepani, Antonio Rubio Jr. Carlos Sambo Bernadette Monet, SK Federation President Jesie Ricafuerte mantang an mga department head iyo sinda Municipal Treasurer Nancy Sambo, Budget Officer Maria Alsol, Municipal Social Welfare Officer Luz Buenaobra asin Local Civil Registrar Officer Leonor Lazala, si ibang empleados asin kaibanan sa familia dai naman nginaranan.

 

NAGLUWAS SA SOCIAL MEDIA


 Sinabi pa kan jefe ejecutivo kan Febrero 9, 2020 nagluwas sa mga text asin Social Media na igwang casong coronavirus na taga Magarao, Camarines Sur alagad an baretang ini fake news asin an banwaan nin Magarao CLEAR and UNAFFECTED kan 2019 novel coronavirus.

 

HOME QUARANTINE


‘’Totoong igwa na nagkapera na naghali sa Macau para sa sarong halipot na pagbabakasyon alagad samuyang sinunod asin inobserbahan tolos an Precautionary and Voluntary quarantine sa laog nin katorceng aldaw susog sa Algorithm kan Philippine Society for Microbiology and Infectious Diseases. An higot na pag-ekasamin kan mga taga DOH sa mga nanonongdan asin mayo lamang nahiling na sintomas o senyales kan coronavirus. Asin an self-quarantine na ini, natapos ngonian na aldaw Febrero 12.’’


Sinabi pa kan jefe ejecutivo na mayo siyang familia na nag-quarantine sa Pasacao, Camarines Sur.                                                                          
                                 (dpa)

Share on Facebook
Share on Twitter
Please reload