Protesta ni Andaya vs Migz, ibinasura

February 13, 2020

Piglalaoman na ni Gobernador Miguel R. Villafuerte na ibabasura man sana kan Commission on Election (Comelec) an protesta sa eleksyon na sinangat ni dating Diputado Rolando Andaya Jr. alagad kun igwang cuestion puedeng ‘honest mistake’ sana, sabi kan kampo kan gobernador.


Si Vocal Romulo Hernandez kan segundo distrito kan Camarines Sur asin haloy nang kaalyado kan mga Villafuerte nagpahayag na deficil man mangyari an darayaan sa computerized elections.


Kampante sana an gobernador sa trabajo bilang jefe ejecutivo kan Capitolyo Provincial kan Camarines Sur dawa na igwang protesta sa Comelec contra sa saiya.


Alagad sinabi pa ni Hernandez na aram na kan joven na gobernador an magiging desisyon kan Second Division kan Comelec mantang mayong suficienteng evidencia na pigpresentar si Andaya na nakalaban niya sa cargong gobernador kan nakaaging eleksyon lokal.


An desisyon pinaluwas kan Enero 31, 2020 kan  2nd division kan commission na pinamamayohan ni Commissioner Luie Tito Guia  asin an miembros sinda Commissioner Socorro Inting asin  Commissioner Antonio Kho Jr, na ibinasura na an election protest ni Andaya contra ki Villafuerte.


Sinabi kan Comelec nagpalyar si Andaya na ipresentar  an detalye sa sahot na nagkaigwa nin darayaan  asin  iregularidades kan 1,632 mga precinto na pigmamando kan seksyon 7 (g), Rule 6 sa resolucion kan commission numerado 8804 na nagresulta nganing ibasura an protesta.


Sa acusasyon kan dating congresista sa isyu sa malfunctions kan Vote Counting Machines (VCMs), corruption of SD Cards, rejection and pre-shading of ballots dai man nasusteniran kun saen na precinto nangyari. 


Dai  man  naconvencer an Comelec sa mga alegasyon na nangyari sa mga precinto asin clustered precincts sa Camarines Sur.


‘’Comelec  finds  Andaya’s petition insufficient in form and substance that it made them decide to dismiss and junk the electoral protest against Villafuerte’’


Kabali sa protesta iyo an alegasyon sa barakalan nin voto, pagdistribuer nin Huawei tablets sa mga paratukdo sa panahon kan karampanyahan asin an mga paratukdo nagserbe komo miembros kan Electoral Board, alagad dai na ini macoconsiderar nganing tugotan na bukasan asin bilangon an mga balota nin huli ta dai man nasuportaran an alegasyon.

Share on Facebook
Share on Twitter
Please reload